Un caligrama n’asturianu ganó ex aequo’l concursu pa escolinos na categoría de 11 a 13 años

L’Asociación d’Escritores d’Asturies entamó nel marcu de les XIX Xornaes Lliteraries en Pravia, en collaboración col Conceyu de Pravia, el IV Concursu de Caligrames pa escolinos. La ribeseyana Marina Fernández Cueto llevó'l primer premiu na categoría de 11 a 13 años ex aequo con un trabayu feminista n'asturianu.

Escolina de l’IES Avelina Cerra, entituló’l so caligrama como ‘El gritu de les que non tienen voz’, incorporando mensaxes contra la violencia machista formando una persona que da un glayíu. Pal xuráu foi’l merecedor del primer premiu xunto con Paula del Rivero, del avilesín Colegio San Fernando, na estaya de 11 a 13 años.

“Como presidenta de l'Asociación d'Escritores d'Asturies quiero dexar constancia del mio contentu pola participación (300 caligrames) y pola calidá de los trabayos presentaos, y agradecer a los maestros y maestres por animar al alumnáu a participar. Amás, felicitar a los escolinos por trabayar con tantu enfotu la poesía, non solo a los ganadores, tamién a todos los participantes”, apuntó María Esther García López tres anunciar esti mes el fallu del concursu.

El restu de vencedores foron Laura Riopedre, del Colegio San Fernando, na categoría de 9 a 10 años, y Leiny Melissa Rodríguez Castellanos, del IES de Pravia, na de 14 a 15 años.