"Ye dar solución a una situación inxusta del profesoráu", diz Llera

Iniciativa pol Asturianu considera "absurdo esperar" pa crear la especialidá docente cuando hai consensu al respeuto.

"Sorprendiónos bastante, teniendo en cuenta los conceyos que caltuvimos en Madrid, nos qu'hebo unanimidá en que yera una cuestión qu'había que resolver", apuntó Iván Llera, presidente del coleutivu, nuna rueda de prensa celebrada esta mañana pa valorar dichos alcuentros con representantes asturianos del PSOE, Xuníes Podemos, Foro y PP nel Congresu. "Sorpréndenos y nun entendemos por qué ye una cuestión que ta venceyándose al tema de la oficialidá. Sí ye verdá que la oficialidá solucionaría'l tema de la especialidá docente, pero teniendo en cuenta que nun va haber oficialidá nesti momentu, polo que paez, porque falta un diputáu pa sacar alantre esa mayoría, sí pensamos que sí tien solución. Namái ye modificar un decretu y hai voluntá de los grupos políticos, polo menos de los diputaos colos que contautamos", añadió al tiempu qu'insistió en que "ye absurdo esperar".

Llera quixo destacar que la especialidá docente de Llingua Asturiana y Gallego-asturiano "nun ye tanto una cuestión llingüística, sinón solucionar una situación inxusta del profesoráu asturianu: ta precarizáu, con medies xornaes la mayor parte del tiempu y hasta'l día enantes de comenzar el cursu nun tienen destín. Nun tienen estabilidá y lo que faen ye cambiar de rama pa poder vivir". "Ye una situación insostenible que se si pue solucionar hai que solucionala yá", siguió.

Poro, anunció que va solicitar un conceyu cola conseyera d'Educación, Carmen Suárez, "pa plantega-y esti tema porque consideramos que nun ye aceptable esta situación. Ye la Conseyería d'Educación y el Gobiernu d'Asturies el que tien que dir a Madrid a esplicar esti tema y a dicir que nun pue esperar pola oficialidá".

La partida pa l'ALLA

Sobre los asuntos trataos en Madrid con parllamentarios y senadores aprovechando la participación nel actu de presentación nel Congresu del manifiestu ‘Pluralidá llingüística: llibertá, igualdá y democracia’, robláu tamién por Acció Cultural del País Valencià, Plataforma per la Llengua, Òmnium, A Mesa pola Normalización Lingüística, l’aragonesa Nogará, Kontseilua y el Centre Internacional Escarré per a les Minories Ètniques i Nacionals (Ciemen) como miembros de la Plataforma Igualdá Llingüística, ente los que taba la creación de la especialidá, destacó tamién la creación d'una partida nos Presupuestos Xenerales del Estáu pa l'Academia de la Llingua Asturiana (ALLA), al igual que'l restu de les academies. "Tuvieron una mui bona disposición pa dambes coses. Sobre la especialidá dixeron que yera un trámite mui cenciello, mentes que sobre lo segundo viéronlo difícil pa esti añu, pero mui posible pal qu'entra", apuntó Llera.

No que respeuta al manifiestu, rescampló que "dimos voz a la situación de les llingües que tovía nun tienen estatus d’oficialidá n’España como ye’l nuesu casu o'l del aragonés".