Iniciativa pol Asturianu algama compromisos en Madrid sobre la especialidá y la partida pa l’ALLA

“Vamos trabayar pa que se faigan realidá”, comentó Iván Llera tres algamar compromisos sobre la especialidá docente y la partida pa l’ALLA nos Presupuestos Xenerales del Estáu del PSOE, Xuníes Podemos, Foro y PP. El presidente d’Iniciativa pol Asturianu participó nel Congresu na presentación del manifiestu ‘Pluralidá llingüística: llibertá, igualdá y democracia’ que roblen ocho coleutivos.

Tres aconceyar ayeri col diputáu Roberto García Morís y les senadores María Jesús Álvarez González, María Fernández Álvarez y María Mercedes Otero, amás del parllamentariu gallego Guillermo Meijón, que s’ocupa de cuestiones llingüístiques dientro del grupu socialista, con una valoración positiva del alcuentru, la delegación de la organización asturiana desplazada a Madrid fixo güei lo propio colos congresistes Sofía Fernández Castañón (Xuníes Podemos), Isidro Martínez Oblanca (Foro) y Paloma Gázquez (PP). Los dos primeros treslladaron el so compromisu de sofitar los dos asuntos principales puestos enriba de la mesa, esto ye, la creación de la especialidá docente de Llingua Asturiana y Gallego-asturiano y la inclusión d’una partida pa l’Academia de la Llingua Asturiana (ALLA) nos Presupuestos, al igual que’l restu d’academies, mientres que la popular, “magar les diferencies, vio lóxiques estes dos demandes”.

Enantes, Llera participara nel actu de presentación del manifiestu ‘Pluralidá llingüística: llibertá, igualdá y democracia’, que robla Iniciativa pol Asturianu xunto con Acció Cultural del País Valencià, Plataforma per la Llengua, Òmnium, A Mesa pola Normalización Lingüística, l’aragonesa Nogará, Kontseilua y el Centre Internacional Escarré per a les Minories Ètniques i Nacionals (Ciemen) como miembros de la Plataforma Igualdá Llingüística. Nel mesmu, dividíu en trés bloques, el periodista encargóse de tratar la parte referida a les llingües non oficiales, demandando la necesidá del Gobiernu de mirar pola situación d’estos idiomes.

Tamién tomó parte nun alcuentru previu con dellos diputaos, ente ellos el socialista asturianu Morís y el gallegu Meijón, Gabriel Rufián (ERC), Íñigo Errejón (Más País), Laura Borrás (Junts per Catalunya) o Joan Baldoví (Compromís), ente otros. Nel mesmu tamién esplicó a los parllamentarios presentes la situación de les llingües non oficiales y, en concreto, de la llingua asturiana.

“Como’l nuesu casu ye bastante desconocíu pa estos diputaos, traté de facelo al traviés d’exemplos concretos, como’l tema del profesoráu o la prohibición a la conseyera Berta Piñán d’emplegar l’idioma na Xunta Xeneral”, rellató Llera, qu’entregó a tolos presentes el llibru coles intervenciones del primer seminariu ‘Oficialidá, el camín constitucional de futuru pal asturianu’, “que recibieron con munchu interés”.

Na semeya, Llera, primeru sentáu de la derecha, xunto colos representantes del restu de coleutivos firmantes del manifiestu ‘Pluralidá llingüística: llibertá, igualdá y democracia’.