Fina la panderetera María de Trabáu

Destacó pol so conocimientu de repertoriu de música tradicional, del que bebieron numberosos investigadores y grupos.

Tres una enfermedá que la afeutó nes selmanes últimes, dexónos a los 87 años María González González, 'María de Trabáu', como yera conocida por ser natural d'esti llugar de Degaña. Ún de les persones que más contautu tuvo con ella, el cantante y estudiosu Xosé Antón Fernández 'Ambás', dio ayeri l'anuncia de la perda en redes sociales nuna entrada cargada de ciñu y agradecimientu.

"Arcides ya María, las harmanas cunqueiras de Trabáu, fonon el más grande referente de la música tradicional d'esa tierra del suroccidente asturianu, fonon las muyeres que conocí col mayor repertoriu tradicional d'Asturias ya sei que bona parte de los repertorios de muitos grupos d'esta tierra salieron de las súas memorias", esplica Ambás al tiempu qu'espeya la gran amistá que-yos xunía a él y a Ramsés Ilesies con elles. Dambes protagonizaron nel 2012 el discu númberu 15 de la serie 'Fontes sonores de la música tradicional asturiana', del Muséu del Pueblu d'Asturies, col folclor de Degaña, onde interpretaben pieces de baille a lo suelto como 'El baiḷḷe las castañuelas' y 'L’amudar'; agarraos como 'La rumba' y 'El valse'; cantares d’aguilandu; villancicos; cantares de ronda; y añaes.

"Asturias pierde un referente único de la música tradicional ya queda güérfana otra vez de madres únicas como María Trabáu, una fonte au muitos fomos beber", fina'l so agradicimientu Ambás.

Na semeya, María, a la derecha, xunto cola so hermana Arcides nuna salida de campu del cursu de 'Música y Baille Tradicional' de la Universidá Asturiana de Branu (UABRA) del añu 2012.