L’asturianu entra nel grupu de 65 llingües con más de 100.000 artículos en Wikipedia

La Wikipedia n’asturianu ta acabante de superar la cifra de 100.000 artículos. La llingua asturiana entra asina nel grupu de 65 idiomes que pasen esa cantidá nun tiempu nel que los usuarios asturianos centren los sos esfuercios n’ameyorar la calidá de los conteníos.

L’inglés, con 6 millones d’artículos, ye’l líder indiscutible d’una llista na que namái 16 llingües pasen del millón d’entraes, ente elles el castellanu, novenu con dalgo más de millón y mediu. El catalán ocupa’l puestu 19, con 636.232; l’eusquera’l 29, con 350.401; y el gallegu'l 49, con 161.153.

L’asturianu entra agora nesi grupu de 65 idiomes sumando, nel momentu de la redaición d’esta noticia, 100.015, cantidá asemeyada a la del taxik y el letón. Con 15 años y mediu de vida, la Wikipedia en llingua asturiana vivió en crecimientu espectacular nestos años últimos, yá que dende’l 2017 dobló’l númberu d’artículos, pasando de 50.000 a 100.000.

“Nestos momentos tamos más centraos en correxir y aumentar la calidá de los artículos esistentes qu’en crecer en númberu”, apunten dende l’alministración de Wikipedia n’asturianu. Ello ensin dexar de trabayar naquellos de más actualidá, como pue ser recientemente'l del baloncestista Kobe Bryant, fináu'l domingu n’accidente aereu, nun llabor que nun apara.