Entregáronse nel Aula Magna de la Universidá los XIX Premios de la Crítica d'Asturies

Lourdes Álvarez, ganadora de la estaya de poesía n'asturianu por ‘P’anular los adioses’, ausentóse na gala por tar de viaxe, recoyendo'l so gallardón José Luis Rendueles.

L'Aula Magna de la Universidá d'Uviéu acoyó'l vienres la gala d'entrega de los XIX Premios de la Crítica d'Asturies qu'entrega l'Asociación d'Escritores d'Asturies, actu que contó cola asistencia d'Adrián Barbón, presidente del país, qu'usó l'asturianu en parte de la so intervención afirmando que "tamos obligaos a evitar la desapaición de la nuesa llingua". Amás, Pedro de Silva recoyó'l XIV Premiu de les Lletres a una trayeutoria, y Tino Pertierra y Marcelo Matas, el Premiu Columna Lliteraria 2019.

Los Premios de la Crítica d'Asturies reconocen los llibros más destacaos del añu anterior en cuatro estayes, nesti casu del 2018. La de poesía n'asturianu foi ‘P’anular los adioses’ (Trea), d'Álvarez, que nun pudo acudir al actu por tar de viaxe, siendo Rendueles l'encargáu de recoyer el gallardón.

La de narrativa n'asturianu quedó nesta edición erma, mentes que en castellanu foi pa ‘El inventor de sueños’ (KRK), d’Adolfo Casaprima. En poesía en llingua castellana, el ganador resultó ‘Pájaro herido’ (Bajamar), de Carlos Iglesias.

Semeya obra d'Armando Álvarez.