Xuan Xosé Sánchez Vicente, II Premiu Nacional de Lliteratura Asturiana “pola so trayeutoria intelectual y lliteraria”

L'escritor xixonés Xuan Xosé Sánchez Vicente asocede a Xuan Bello como merecedor del Premiu Nacional de Lliteratura Asturiana, de calter triañal, que concede l’Academia de la Llingua Asturiana (ALLA). Nesta segunda edición presentáronse un total de trés candidatures pa esti gallardón que reconoz una trayeutoria.

El xuráu aconceyó’l miércoles pasáu y el so fallu diose a conocer esta mañana. Tuvo presidíu por Xosé Antón González Riaño, presidente de l’ALLA, y formáronlu los miembros de númberu de la institución Ana María Cano González, Xosé Ramón Iglesias Cueva y Carmen Muñiz Cachón; y los profesores de la Universidá d’Uviéu José Luis García Martín y Leopoldo Sánchez Torre, con Antón García, direutor xeneral de Política Llingüística, como secretariu en representación del Gobiernu.

Por unanimidá decidieron conceder el II Premiu Nacional de Lliteratura Asturiana, que cuenta con una dotación económica de 3.000 euros, a Sánchez Vicente, candidatu na primer edición, pola “so trayeutoria intelectual y lliteraria que lu convierten nun referente a lo llargo de cinco décades y nún de los mayores activos de la lliteratura asturiana”. El xuráu tamién sorrayó que “amás de cultivar con dedicación constante y aciertu tolos xéneros (poesía, narrativa, teatru, ensayu), abrió caminos nuevos nesta milenaria llingua a partir d’un fondu conocimientu y respetu pola tradición, de la que foi de los primeros estudiosos y divulgadores”.

L’ALLA creó esti gallardón nel 2016 “pa facer pública reconocencia del llabor normalizador que representa la creación lliteraria nel idioma d’Asturies y el papel fundamental que xueguen los y les escritores en llingua asturiana nel caltenimientu de la cultura de nueso”, valorando “el conxuntu de toa una trayeutoria lliteraria, fecha a lo llargo del tiempu en llingua asturiana, y la so contribución a la dignificación social del asturianu”. El primer ganador foi Bello, al que sigue agora Sánchez Vicente, que va recoyer el premiu el 8 de mayu coincidiendo cola celebración n’Uviéu del XLI Día de les Lletres Asturianes.

El Premiu Nacional de Lliteratura Asturiana lleva arreyáu la espublización d’una pequeña amuesa de la obra lliteraria del autor y la concesión d’un Medayón Conmemorativu, diseñáu pol escultor Adolfo Manzano. Amás de la candidatura de Sánchez Vicente, tamién se presentaron nesta segunda edición la Lourdes Álvarez y Adolfo Camilo Díaz.