Carreño va contar con un festival del llibru y de la cultura asturiana con vocación añal

Candás va acoyer del 22 al 25 d’ochobre’l Regueriada Fest, un festival del llibru y la cultura asturiana con actividaes llúdiques, artes escéniques, música y gastronomía. La Durangoko Euskal Liburu eta Disko Azoka ye una de les referencies pa esti proyeutu conxuntu del Conceyu de Carreño y Política Llingüística.

La Feria del Llibru Asturianu, que se celebró n’abril del 2018 dientro la XXXIX Selmana de les Lletres Asturianes y que punxo’l ramu del Programa Cultural Antón de Marirreguera, cola participación de 8 llibreríes y editoriales, va tener continuidá col Regueriada Fest. La idea ye básicamente la mesma, con Antón de Marirreguera, escritor nacíu en Llorgozana al rodiu del 1605, primer poeta n’asturianu conocíu de la historia –el ‘Pleitu entre Oviedo y Mérida: Sobre la posesión de las cenizas de Santa Eulalia’ ye’l primer poema nel nuesu idioma que llegó a los nuesos tiempos–, y la época na que vivió, el Barroco, como temes centrales d’un certame que va implicar a escritores, llibreríes, editoriales, profesoráu, alumnáu y sociedá de Carreño en xeneral.

El direutor xeneral de Política Llingüística, Antón García, y l’alcaldesa de Carreño, Amelia Fernández López, presidieron ayeri una xunta de trabayu p’afondar nel proyeutu, na que tamién tuvieron presentes Marusca Dintén, responsable de la Biblioteca Municipal González Posada; el direutor del Teatro Prendes, Alain José Fernández; y Juncal García, téunica del Serviciu de Política Llingüística. Pal desendolcu del Regueriada Fest, que va tener una periodicidá añal, tán tomándose como referencia otres feries o eventos asemeyaos, como ye’l casu de la Durangoko Euskal Liburu eta Disko Azoka qu’entama la Gerediaga Elkartea en Durango dende l’añu 1965 col oxetivu de dar a conocer la producción editorial y discográfica n’eusquera, averando los creadores al públicu, y qu’añguaño cuenta con una amplia programación.

Recuperación del SNL del Cabu Peñes

Otru de los temes que tuvo sobre la mesa foi la situación del Serviciu de Normalización Llingüística de la Mancomunidá del Cabu Peñes, anguaño inactivu. La intención de Política Llingüística y el Conceyu de Carreño ye la de recuperalu a lo llargo del 2020, con una partida de 14.400 euros pa ello nos actuales presupuestos.

Na semeya, Juncal García, Antón García, Fernández López, Dintén y Alain José Fernández.