Timmermans diríxese “a los mineros d’Asturies” na presentación del plan p’afrontar la descarbonización

“Lo que facemos equí ye un mensaxe pa los mineros de carbón d’Asturies, Macedonia Oeste o Silesia” apuntó’l vicepresidente de la Comisión Europea, Frans Timmermans, esti martes na sesión del Parllamentu Européu. Acudió a Strossburi pa presentar’l plan p’afrontar la descarbonización con un fondu esperáu de 100.000 millones pa los territorios mineros nos años próximos.

La Xunión Europea pretende movilizar esta cantidá de fondos públicos y privaos nuna década pa convertir a Europa neutru de carbonu nel horizonte del 2050. El Fondu de Transición Xusta del que se podría beneficiar Asturies va repartise siguiendo aspeutos como la riqueza del Estáu o les tases de paru na zona afeutada pola descarbonización.

La negociación presúmese llarga, polo que nun s’espera que sía realidá polo menos hasta últimos d’añu. “Esti mecanismu contribuirá a sofitar a los más afeutaos”, siguió Timmermans tres dirixise a los mineros asturianos, asegurando que “tol mundu, incluyendo los más vulnerables, van beneficiase d’esti cambiu” hacia una economía verde.