El SNL de Ḷḷena va repartir 5.000 pegatines nel área de Pediatría del Centru de Salú de La Pola

‘Toi alicando’, ‘Soi mui grande’, ‘Pórtome de mieu’ y ‘Nun ḷḷoré’ son los cuatro modelos editaos pol Serviciu de Normalización Llingüística de Ḷḷena colos que se va ‘premiar’ a les neñes y neños que tengan qu’acudir al área de Pediatría del Centru de Salú de La Pola. Van repartise, nuna primer tirada, un total de 5.000 pegatines.

"La campaña ye un pasu más nel procesu de normalización y abre un espaciu nuevu d'usu del asturianu del que nun teníemos precedentes", aseguró David Suárez ‘Cai’, edil de Política Ḷḷinguística. Refierse a la Sanidá, onde l’emplegu del idioma nun ye habitual y que dende’l Conciyu consideren mui importante.

Nel casu d’esta campaña concreta, destinada al serviciu de Pediatría, entiéndese qu’este 5.000 pegatines “van facer un trabayu de normalización importante, porque nun sólo van vela los nenos y nenes, tamién la familia o'l centru escolar cuando vuelva a la escuela”, apunten dende’l SNL dirixíu por Penélope Miranda. Les cuatro pegatines usen la variante llingüística de Ḷḷena “como ye normal, buscando la identificación de la xente col mensaxe que se pretende difundir”.

La intención del Conciyu ye da-y continuidá a esta iniciativa, cola posibilidá d’ampliala a los centros escolares pal cursu próximu.