Barbón afirma en Valdesoto que "hai que reivindicar les nueses tradiciones culturales"

El presidente acudió al Domingu de Sidros y Comedies, que foron un ésitu de públicu.

L'Asociación pola Recuperación de los Sidros y Les Comedies ‘El Cencerru’ convidó al presidente del país, Adrián Barbón, a asistir a la celebración d'esta mazcarada d'iviernu, Bien d'Interés Cultural (BIC) dende xunu, yá conocida pol socialista por presenciala en direuto n'años anteriores. "Recomiendo siempre que naide nun se pierda los sidros y les comedies porque, aparte que ye recuperar una tradición mui de nueso, y nesi sen forma parte de la nuesa historia, hai que recuperar les nueses tradiciones culturales, tamién estes mazcaraes d'iviernu", aseguró en Valdesoto, al tiempu qu'invitó a toles asturianes y asturianos a "que vengan otros años porque paga la pena".

L'alcalde de Siero, Ángel García 'Cepi', y otros primeros ediles tamién se desplazaron al llugar pa disfrutar del Domingu de Sidros y Comedies, nel que los escolinos de Faes representaron 'Los Fiensos', comedia escrita por Pergentino Martínez, y los miembros de la mazcarada 'CDR (Comedia en Defensa de la Rexón)', de José Ramón Oliva. Númberoso públicu averóse al campu la Ilesia pa riise con dambes obres y disfrutar de los blincos de los sidros.