El domingu ye de sidros y comedies en Valdesoto

José Ramón Oliva escribe un añu más la obra de la mazcarada d'iviernu sierense.

Valdesoto yá espera pol Domingu de Sidros y Comedies, celebración que tien llugar el domingu depués de Reis. Como ye vezu, los sidros van anunciar a los vecinos, col soníu de los sos cencerros y los sos blincos, la representación de la comedia, que va tener llugar pasaes les 12.30 hores nel campu la Ilesia, depués de la salida de misa.

Los Escolinos de Faes van ser los primeros con 'Los Fiensos', escrita por Pergentino Martínez. Tamién repite como responsable de la comedia, nesti casu la d'adultos, Oliva, que va repasar l'actualidá llocal, asturiana y mundial en 'CDR (Comedia en Defensa de la Rexón)'.

L'Asociación pola Recuperación de los Sidros y Les Comedies ‘El Cencerru’ ye la organización que s'encargó de recuperar esta tradición, qu'estrena'l títulu de Bien d'Interés Cultural (BIC), y de dar a conocer los sidros más allá de les llendes d'Asturies cola participación en numberosos desfiles y aconceyamientos de mazcaraes d'iviernu. Asina, el 28 d'avientu acudió al VII Encontro de Máscaras de Mogadouro, na Tierra de Miranda.