“Sentimos la necesidá de cantar dalgo diferente y contar dalgo diferente”, apunta Elola

Les integrantes de l’Asociación de Música Tradicional Muyeres afronten “con nervios” los últimos ensayos de ‘Humanes’, que s’estrena’l sábadu nel xixonés Teatru de la Llaboral. “Trai la historia de 13 muyeres en 15 cantares d’una manera dinámica”, espresa Marta Elola, direutora musical, sobre l’espectáculu baxo direición escénica de Borja Roces basáu nel CD de mesmu nome.

Ésti va ponese a la venta’l mesmu sábadu na propia Llaboral y trátase del primer trabayu de Muyeres que cuenta con composiciones propies, “dalgunes feches por nós mesmes y otres encargaes a autores”, sobre histories de muyeres, "anónimes na so mayoría". Asina, Pablo Texón, Ruma Barbero o Alfredo González ponen la so firma a dalgunes de les pieces incluyíes nel discu y que, al igual qu’asocedió con ‘País malva’, Muyeres lleva al escenariu nuna especie de musical.

27 persones van encargase d’interpretar estes histories “d’una manera dinámica, enllanzando pieces ensin que’l públicu práuticamente se dea cuenta” y intercalándoles con presentaciones. D’elles 24 son pandereteres de Muyeres, a los qu’hai que sumar 7 músicos, de les que 3 tamién son integrantes de l’asociación de música tradicional.

La primer historia que se dio a conocer foi la de ‘Pinky’, nomatu de neña de la periodista estauxunidense Elizabeth Jane Cochran (1864-1922), al traviés de redes sociales como adelantu del discu nel que s’apostó per primer vegada pola composición propia “porque necesitábamos una renovación. Son 30 años dende qu’echamos a andar col sentíu de la recopilación y investigación de la música tradicional y nesti tiempu fuimos evolucionando ensin dexar de ser pandereteres tradicionales, pero sentimos la necesidá de cantar dalgo diferente y contar dalgo diferente”. Sicasí, siempre bebiendo de la tradición.

5.540 euros recaudaos

A la espera de la llegada del sábadu, y col ensayu xeneral con músicos previstu pa esta tarde, Muyeres celebra’l gran ésitu de la campaña de micromecenalgu na rede entamada al traviés de la plataforma Verkami pa cubrir gastos pendientes de la ellaboración de la indumentaria y la escenografía del mesmu que se zarró güei. El coleutivu nun sólo algamó los 4.500 euros necesarios, sinón que los superó ampliamente pa recaudar un total de 5.540 euros.

“Los costos de vistir a 27 persones son altos y por eso decidimos entamar esta campaña. D’esta forma amás de poder afrontar el gastu de les indumentaries diseñaes Azucena Bedia, que tamién fixo la de ‘País malva’, pudimos incorporar dellos detalles na escenografía del espectáculu”, celebra Elola. Les entraes pal mesmu, programáu pal sábadu a les 20 hores, tán entovía a la venta a un preciu de 20 euros nel fosu, 18 nel patiu de butaques, 15 nos palcos y 12 nel anfiteatru.

Na semeya, Roces dirixe un ensayu de 'Humanes'.