El presidente Barbón felicita l'añu nuevu n'asturianu y castellanu

Emplegó les redes sociales pa difundir un mensaxe xunto con una semeya de Picos.

"A puntu de cruciar l'estragal d'un añu nuevu, suañemos el futuru... Qu'el 2020 venga cargáu d'esperanza, dexando atrás la llercia. Colos mios meyores deseos p'Asturies, pa ti y pa la to xente. ¡Feliz añu!" ye'l testu emplegáu pol presidente Adrián Barbón pa felicitar l'añu nuevu, que contó tamién con versión en castellanu, anque non en gallego-asturiano, la llingua del occidente del país.

Esta situación contrasta cola del so predecesor, el tamién socialista Javier Fernández. La so felicitación del 2015 del añu nuevu pasó a la historia al incluyir el mensaxe 'Felices fiestes' en castellanu y n'otros 13 idiomes; nengún d'ellos yera l'asturianu.