Escenines pa la Reciella allegra la Navidá con trés espectáculos

El festival d’artes escéniques en llingua asturiana pa neños y neñes Escenines pa la Reciella cumple un añu más cola so cita navidiega en Xixón. El salón d'actos del Centru de Cultura Antiguu Institutu repite como sede nesta sétima edición del certame, na que ‘Reciella. Families pol Asturianu’ programa trés espectáculos teatrales.

La primer cita va tener llugar mañana, a les 19 hores, cola obra ‘Les madreñes vacíes’, de Carlos Alba ‘Cellero’. Trátase d’una función de títeres encamentada pa mayores de 5 años que protagoniza un xuglar y Miguelín, un neñu qu’atopa nel so caleyar pel mundu al que nun-y traxeron nada los Reis Magos, secuestraos pol Señor de la Guerra.

El sábadu va ser el turnu de los cuentacuentos, a cargu de Factoría Norte, compañía que ta acabante de llevar el III Premiu y Festival Nel Amaro de Teatru Profesional en Llingua Asturiana o Gallego-asturiano pola obra ‘Les rellaciones peligroses’. Nesta ocasión va poner n’escena al meudía ‘La bruxa Maruxa’, encamentada pa neñes y neños d’ente 3 y 7 años.

La tercer y cabera función d’esta edición d’Escenines pa la Reciella va ser pa la obra teatral ‘El viaxe de Dorothy’, recomendada pa rapacines y rapacinos d’ente 3 y 11 años, que Fantastique Company va representar el llunes a les 19 hores. Trátase d’una adaptación del llibru ‘The Wonderful Wizard of Oz’ de Lyman Frank Baum popularizáu mundialmente pola película protagonizada por Judy Garland.