Skama la Rede zarra la xira 15 aniversariu con un conciertu nel que va tocar completu ‘La nuesa hestoria’

El primer discu de Skama la Rede, ‘La nuesa hestoria’, va sonar completu nel conciertu fin de xira pol 15 aniversariu d’esti sábadu en Candás con La Tarrancha como convidaos. “Vamos tocalu de siguío, con arreglos en dalgunos cantares, na primer parte de l’actuación”, adelanta'l cantante Miguel Fernandi ‘Burilo’.

“Apetecíanos facer dalgo especial. Ye dalgo que faen tolos grupos y que nós nunca fiximos”, esplica’l lluanquín sobre un conciertu que ta creando muncha espectación en Candás y tol Cabu Peñes. “Paez que tolos grupos d’amigos quedaron pa esti sábadu y toos dicen que van pasar pela CNT”, añade.

La cita ye na Casa’l Pueblu d’esti sindicatu, con aforu pa 300 persones, mañana dende les 21.30 hores, momentu d’apertura de puertes y entamu de la venta de los bonos de sofitu de 5 euros. Primero va abrir La Tarrancha a les 22.30 hores, pa depués siguir la folixa con dos pases de Skama la Rede dende la medianueche cola presencia de miembros antiguos del grupu y collaboraciones en dalgunos temes.

“El primeru ye de 45 minutos. Vamos tocar ‘La nuesa hestoria’ de siguíu, de la 1 a la 12, con arreglos en dalgunos cantares”, adelanta a Asturies.com Burilo. Depués, trés una posa d’unos diez minutos, otra hora de conciertu con una esbilla de temes del restu de trabayos de Skama la Rede.

Como adelantu a la fiesta de mañana, la banda asoleyó güei un doble discu dixital que repasa los cantares más conocíos y les versiones o collaboraciones que fixo la banda pa dalgunos recopilatorios.