Un Teatru Palacio Valdés enllenu emociónase con ‘La banda sonora de la oficialidá’

El 14 d’avientu del 2019 va ser una fecha que va quedar marcada na memoria de les 600 persones qu’enllenaron el sábadu’l Teatru Palacio Valdés. L’espectáculu ‘La banda sonora de la oficialidá’, entamáu con motivu de la presentación del discu-llibru homónimu, emocionó tanto al públicu como a los propios músicos.

La Xunta pola Defensa de la Llingua Asturiana (XDLA) apostó por esti formatu, alloñáu al habitual del Conciertu pola Oficialidá, pa conmemorar los 30 años d’esta cita que recuerda con esta espublización tan especial qu’inclúi ensayos, semeyes y grabaciones inédites de les cites del 1989, 1990, 1992 y 1993 d’actuaciones de Tuluergu, Balandrán, Karne Antisocial, Boides, Lliberdón, Cambaral, Llan de Cubel, Dixebra, Xuacu Amieva, Horacio Huerta, Mariluz Cristóbal Caunedo o José Collado Vida. Asina, la Banda 14A, formada a costafecha pa ‘La banda sonora de la oficialidá’, sirvió de base musical de los diferentes artistes que foron xubiendo al escenariu.

Les Pandereteres pola Oficialidá foron les primeres n’apaecer nel Palacio Valdés depués de que les gaites d’Esbardu amenizaren la espera a la puerta del teatru avilesín. Interpretaron ‘El ramu de la oficialidá’ qu’acompaña toles manifestaciones de la XDLA dende’l 2009 pa dar pasu a Natalia Suárez Ríos, que s’encargó de presentar l’actu.

Ún a ún, con intervenciones pentemedies de militantes de la organización cívica, foron xubiendo tolos artistes anunciaos pa interpretar un tema xunto a la Banda 14 A. Abrió esta fase del espectáculu Anabel Santiago, con ‘L’asturianu ye mio patria’; pa siguir Delfo Valdés, acompañaú por Fabián Díez Zapico al trombón, con ‘Salíi llokes’, y Leticia Baselgas con ‘Muñeira d’A Estierna’, y finar el bloque con un tema instrumental.

Rodrigo Cuevas sorprendió a toos con un cantar del so discu nuevu –asoleyáu un día enantes–, ‘Manual de cortejo’, entituláu ‘Rambalín’ y dedicáu al popular vecín de Cimavilla ‘Rambal’, asesináu na década de los 70, dando pasu darréu a Mariluz Cristóbal con una añada y a Xel Pereda con ‘Los fayeos de mayo’. Santi Caleya musicó depués a la gaita un videu d’homenaxe a munchos músicos que yá nun tán con nós, nun de los momentos más emocionantes de la tarde.

Apaición de la Pita

Pablo Martínez interpretó n’acústicu ‘Friú de xineru’ enantes de que fixera apaición ente aplausos la Pita de la Xunta, que llamó al escenariu a Miguel Fernandi ‘Burilo’ pa que cantara’l tema de Skama la Rede que lleva’l so nome. Siguió Ramón Blanco con ‘Chacho’, Lluci Palomares con ‘Penouta’, David Varela con ‘Na caleya’ y Xune Elipe con ‘La danza’, que tuvo acompañáu por Merce Santos a la gaita rabil y Ambás a la voz, na parte na que’l públicu más s’animó.

Pa finar, Dani García de la Cuesta llamó a tolos participantes nel espectáculu a cantar con él al violín l’históricu ‘Tamos fartos’. Foi’l momentu más risonderu d’un espectáculu qu’emocionó al públicu –ente’l que taba la conseyera Berta Piñán, l’alcaldesa Mariví Monteserín y el direutor xeneral de Política Llingüística, Antón García, ente otros representantes políticos– y a los propios musicos nuna cita yá pa la historia del movimientu de reivindicación llingüística que dexó amuesa de la calidá escelente de la música y de los intérpretes en llingua asturiana y de la vitalidá del idioma magar les torgues.

Na semeya, actuación final de 'La banda sonora de la oficialidá'.