El Palacio Valdés va quedar pequeñu pa disfrutar “de versiones diferentes” en ‘La banda sonora de la oficialidá’

Poques entraes queden na puerta pa la so venta esti sábadu pal espectáculu ‘La banda sonora de la oficialidá’ col que la XDLA presenta’l discu-llibru de mesmu nome polos 30 años del Conciertu pola Oficialidá. Una oportunidá de disfrutar de dieciséis artistes que van interpretar con una banda base “versiones diferentes”.

Nes selmanes últimes, la Xunta pola Defensa de la Llingua Asturiana (XDLA) vieno anunciado en redes sociales los nomes de los doce artistes que van xubir a les tables del avilesín Teatru Palacio Valdés xunto cola formación entamada pa la ocasión, compuesta por Wilón de Calle (batería), Antón Ceballos (baxu), Alvaro Bárcena (guitarres), Rubén Bada (bouzouki, vigulín y guitarres) y Sam Rodríguez (teclaos). La llista de cantantes anunciaos fórmenla Mariluz Cristóbal Caunedo, Xune Elipe (Dixebra), Rodrigo Cuevas, Anabel Santiago, Xosé Ambás (Tuenda), Xel Pereda (Llan de Cubel), Ramón Blanco (Los Berrones), Santi Caleya (La Bonturné), Leticia Baselgas (L-R), Dani García de la Cuesta, Merce Santos (La Bonturné), Pablo Martínez (Desakato), Lluci Palomares (Corquiéu), David Varela (La Bonturné), Delfo Valdés (La Tarrancha) y Miguel Fernandi ‘Burilo’ (Skama la Rede).

Toos ellos, participantes en dalgunes de les trenta ediciones del Conciertu de la Oficialidá, van interpretar cantares, xeneralmente de les sos bandes o repertoriu, xunto cola Banda 14A, “versiones diferentes que serán úniques”, apunta Xosé Candel, de la XDLA, que pronostica que “vamos tener enllenu” nel Palaciu Valdés. Pero l’espectáculu, que va presentar l'avilesina Natalia Suárez Ríos, nun va quedar ehí, yá que la organización anuncia sorpreses y un final coral que promete emocionar al públicu.

La hora d’entamu de ‘La banda sonora de la oficialidá’ ta programada pa les 19 hores –apertura de puertes, a les 18.30, con llocalidaes non numberaes– , mentes que dos hores enantes, a les 17, van ponese a la venta nel propiu Palacio Valdés les poques entraes que queden disponibles de les 600 emitíes a un preciu de 5 euros. Nel momentu qu’empiece l’espectáculu nun se va permitir l’accesu a la instalación.

Tres l’espectáculu, va siguir la folixa con una espicha na Pescadería Municipal Antigua onde la música va siguir siendo protagonista. L’aforu ye llendáu y la entrada tien un costu de 25 euros.

El discu-llibru, un ésitu de ventes

La campaña de micromecenalgu popular na rede entamada pola XDLA pa financiar la edición del discu-llibru ‘La banda sonora de la oficialidá’ ta resultando un ésitu. A falta de menos de 44 hores pal so final, lleva recaudaos 6.545 euros, 2.545 más de los 4.000 necesarios.

“Tamos mui contentos cola respuesta”, rellata Candel, que destaca la calidá del llibru, “con conteníos mui prestosos, como ensayos históricos o distópicos, o los cartelos de tolos conciertos pola oficialidá”, amás de dos CD, “ún con grabaciones históriques”. Asina, van poder sentise una escoyeta de cantares de grabaciones guardaes del Conciertu pola Oficialidá del 1989, 1990, 1992 y 1993 protagonizaes por Tuluergu, Balandrán, Karne Antisocial, Boides, Lliberdón, Cambaral, Llan de Cubel, Dixebra, Xuacu Amieva, Horacio Huerta, Mariluz Cristóbal Caunedo o José Collado Vida.