González Riaño califica’l presupuestu pa la promoción del asturianu de “continuista”

“Nun se pueden poner en práutica toles midíes necesaries pa desendolcar na so totalidá’l marcu xurídicu actual con 1,9 millones d’euros”, entiende Xosé Antón González Riaño, presidente de l’Academia de la Llingua Asturiana (ALLA). Califica de “continuista” el presupuestu del Executivu pa la promoción del idioma.

“Pue esplicase por ser los primeros presupuestos d’esti Gobiernu”, añade González Riaño, qu’espera que la situación cambie según avance la llexislatura. La cantidá que cree necesaria pa desendolcar na so totalidá la Llei d’Usu y Promoción del Bable/Asturianu “son 3,5 millones como mínimo”.

Sobre l’asignación a l’ALLA, de 220.000 euros, poco más de 10.000 euros con respeuto a esti añu, considérala insuficiente. “Nun nos llega nin pa sacar alantre la metá del trabayu y publicaciones pendientes que tenemos”, rellata.

Nesi sen, el presidente llamenta tamién los 24.000 euros que pierde la institución del Conceyu d’Uviéu pola decisión del gobiernu municipal de PP y Ciudadanos d’anular la subvención, cantidá que se destinaba a la organización del Día de les Lletres Asturianes y a actividaes culturales na ciudá.