Muyeres entama una campaña de micromecenalgu pa la indumentaria y escenografía de ‘Humanes’

L’Asociación de Música Tradicional Muyeres yá tien too preparao pa la edición del so trabayu nuevu, ‘Humanes’, que va presentar col habitual espectáculu qu’acompaña los sos discos el 11 de xineru en Xixón. El coleutivu ta acabante d’entamar una campaña de micromecenalgu na rede pa cubrir gastos pendientes de la ellaboración de la indumentaria y la escenografía del mesmu.

En concreto, necesita 4.500 euros, de los que lleva recaudaos 700 nes primeres hores al traviés de la plataforma Verkami. "El discu yá lu tenemos preparáu íntegramente pa la so publicación, con tolos costos de producción asumíos, pero pal espectáculu en direuto, diseñáu y dirixíu por Borja Roces, entá nos falten dellos elementos. Por eso les perres que saquemos con esti micropatrociniu van ser inverties esclusivamente nel diseñu y la ellaboración de la indumentaria, que correrá a cargu de la diseñadora Azucena Bedia, asina como pa la escenografía del espectáculu”, espliquen.

Pa incentivar la participación, Muyeres ufre delles opciones dende los 10 a los 300 euros según les recompenses, apaeciendo como ‘destacada’ la qu’inclúi’l CD de ‘Humanes’, una entrada nel patiu de butaques pa la presentación, un cartelu firmáu y l’apaición nos agradecimientos, que tien un preciu de 38 euros. L’espectáculu va estrenase nel Teatru de la Llaboral el sábadu 11 de xineru a les 20 hores nel teatru de la Llaboral con tickets a 20 euros nel fosu, 18 nel patiu de butaques, 15 nos palcos y 12 nel anfiteatru.