La Nueche en Danza de Noreña va recordar al músicu Elías García

Celébrase esti sábadu na Sala Polivalente La Plaza, onde enantes va organizase un taller de baldre d'iniciación al baille con Santi Galguera.

La Nueche en Danza, la decimonovena d'esta iniciativa qu'echó a andar nel 2015, entámase nesta ocasión en Noreña n'alcordanza d'Elías García. La memoria del músicu de Llan de Cubel, Felpeyu y Tuenda, fináu en setiembre, va tar presente nesta cita que tien como oxetivu ufrir un espaciu a la ciudadanía pa baillar, tocar y cantar, promocionando asina la cultura asturiana.

La cita va ser el sábadu a les 22.30 hores y l'accesu ye llibre. Enantes, a les 20 hores, va tener llugar un taller de baldre d'iniciación al baille p'aquelles persones que quieran algamar unes nociones de cara a la Nueche en Danza.

Dende la organización recuerden, p'aquelles persones que nun quieran garrar coche, qu'esisten buses nocherniegos dende Noreña con direición a El Berrón y Uviéu, y a Cualloto y La Pola Siero. Tamién ye posible acudir dende Uviéu nun autocar con salida a les 21.30 hores y vuelta a les 3.30, pa lo que ye necesario acutar plaza nel númberu de teléfonu 696.180.292.