El III Festival Nel Amaro sigue con 'Una casa'

L'uvieín Teatru Filarmónica acueye esta representación d'Higiénico Papel Teatro.

'Una casa' ye'l tercer finalista del III Premiu y Festival Nel Amaro de Teatru Profesional en Llingua Asturiana o Gallego-asturiano. Trátase d'una historia sobre una familia pequeña que vivía nuna casa pequeña, pero que col tiempu medra y muda a un llar nuevu.

Ésta ye mui grande, con munchos cuartos y un xardín perguapu, pero pela nueche siéntense munchos ruíos y Andrés tien un poco de mieu. Un día, los sos padres marchen a cenar fuera y queda col güelu Lluis, les sos dos hermanes y el perru, y el protagonista nun ye quien a dormir y corre a buscar a Lluis per tola casa, pero nun lu atopa.

L'espectáculu d'Higiénico Papel –ganador de la edición pasada con 'Hansel y Gretel'–, destináu a neñes y neños de 3 a 8 años, va comenzar mañana vienres a les 20 hores, con entrada llibre. Enantes yá se representaren los trabayos de dos de los cuatro finalistes del Nel Amaro, 'Muyeres inesperaes' de Ververemos y 'Crecer' d'El Callejón del Gato, mentes que pal vienres siguiente va ser el turnu de Factoría Norte con 'Les rellaciones peligroses'.