El Gobiernu asitia’l techu de gastu pa negociar los Presupuestos en 4.143 millones d'euros

El proyeutu de Presupuestos Xenerales del 2020 aumenta’l techu de gastu un 2,8 por cientu, pasando de los 4.031 millones d’esti añu a 4.143. Ye la cifra que tresmitió’l Gobiernu nos dos conceyos celebraos con Asturies pela Izquierda y Podemos, formación que pidió a la FSA más concreción nos detalles de les cuentes.

Esta medra, sicasí, yá ta casi comprometida pol incrementu nel gastu de personal d’unos 100 millones, polo que la cantidá pa inversiones queda reducida. Tamién esiste un otru compromisu d’un gastu pluriañal n’inversiones de 200 millones y una medra importante nel gastu sanitariu pol avieyamientu de la población y derivaos de los tratamientos farmacolóxicos, “datos que suponen un factor a tener en cuenta como puntu de negociación”, aseguró ayeri Ana Cárcaba, conseyera de Facienda.

El primer alcuentru de Cárcaba xunto col presidente Adrián Barbón; el vicepresidente y conseyeru d’Infraestructures, Mediu Ambiente y Cambiu Climáticu, Juan Cofiño; la vocera del grupu parllamentariu socialista Dolores Carcedo; y la secretaria d'Organización de la Federación Socialista Asturiana (FSA) y diputada, Gimena Llamedo, foi con Asturies pela Izquierda. El coordinador en funciones d’Izquierda Xunida (IX), Alejandro Suárez, apuntó qu’esiste “una bona sensación” tres l’aconceyamientu, anque añadió que ye pronto p’aventurar cómo concluirá’l procesu negociador.

Xunto a Suárez acudieron a la cita la vocera del grupu parllamentariu Ángela Vallina, el diputáu Ovidio Zapico y l’alcalde de Illas y miembru de la coordinadora, Alberto Tirador. Tres la xunta cola coalición, los socialistes recibieron en Presidencia a los representantes de Podemos: la vocera Lorena Gil, la diputada Nuria Rodríguez y el secretariu xeneral Daniel Ripa.

Gil destacó la voluntá de la so formación d’algamar alcuerdos, pero criticó “l’incumplimientu de tiempos por parte del Gobiernu”, apuntando que la escusa de la repetición eleutoral “nun nos sirve. Los intereses xenerales d’Asturies deberíen tar per delantre d’unes eleiciones xenerales. Nesi sen, llamentar que los presupuestos lleguen tarde”. Sobre los mesmos, apuntó que nun los pudieron conocer en detalle, polo que solicitaron a los socialistes más concreción n'aconceyamientos futuros.

Esta tarde, col PP

Tres la xunta colos dos socios preferentes de la FSA, esta tarde los encargaos de la negociación van tratar colos representantes del partíu principal de la oposición. La cita va ser a les 18 hores en Presidencia.

Na semeya, un momentu de la reunión ente la FSA y Podemos. D'izquierda a derecha, Carcedo, Llamedo, Cofiño, Cárcaba, Barbón, Gil, Ripa y Rodríguez.