Sánchez y Iglesias algamen un prealcuerdu pa un Gobiernu de coalición

En menos de 48 hores dende la conocencia de los resultaos eleutorales, PSOE y Xuníes Podemos algamen un prealcuerdu ensin vetos pa formar un Gobiernu de coalición y desbloquiar la situación política. D’esta forma Pablo Iglesias podría ocupar una vicepresidencia de calter social, pendiente de que Pedro Sánchez algame los sofitos necesarios pa la investidura.

Los movimientos ente les dos fuercies foron rápidos depués de llevar al Estáu a una repetición eleutoral que complicó entovía más les posibilidaes pa formar un Gobiernu estable. El primer pasu pa salvar la situación diéronlu esta mañana los dos candidatos, qu’agora han de convencer al restu de fuercies qu’opten por apoyar un Executivu de coalición del PSOE y Xuníes Podemos o, al menos, l’astención p’algamar una mayoría simple que permita investir a Sánchez.

Al rodiu de les 14.30 hores el presidente en funciones y Sánchez roblaron l’alcuerdu nel Congresu ente los medios de comunicación. Ésti afita que “el PSOE y Xuníes Podemos algamamos un prealcuerdu pa conformar un Gobiernu progresista de coalición qu’asitie a España como referente de proteición de los derechos sociales n’Europa, como los ciudadanos decidieron nes urnes”, y inclúi 10 puntos que van dende la creación d’emplegu a la llucha contra’l cambiu climáticu, pasando por frenar la despoblación o poner en marcha polítiques feministes.

L’abrazu de Sánchez y Iglesias tres la robla simbolizó l’ausencia de vetos d’esti compromisu que va ser la base a un programa de Gobiernu conxuntu. D’esta forma, el líder de Xuníes Podemos algamará una vicepresidencia de calter social.