Rivera dimite y abandona la política tres el fracasu eleutoral de Ciudadanos

El gran perxudicáu de la repetición eleutoral del 10-P foi Albert Rivera, que vio como’l so partíu, Ciudadanos, perdió 47 escaños –ente ellos el d’Ignacio Prendes por Asturies– pa quedar con 10. El catalán anunció esti llunes qu’abandona la presidencia y l’escañu, y que torna a la so actividá profesional como abogáu.

Rivera compareció esta mañana énte la prensa pa dar anuncia d’una decisión yá conocida. “Ye’l momentu de dar pasu a un diputáu que tea al 120 por cientu y que sirva a España como yo estos cuatro años”, apuntó tres calcar en que da esti pasu por cuestión “de responsabilidá”.

Ciudadanos va entamar agora un congresu estraordinariu nel que s’escueya “el futuru y el rumbu d’esti proyeutu, porque’l centru políticu esiste y porque entovía hai munchísimos españoles que necesiten votar lliberal y centru”. Por último, apuntó la so esmolición pola complicada gobernabilidá del Estáu y la división qu’atalanta “ente roxos y azules”.

El partíu naranxa llega a esta situación tres rexistrar n’abril los sos meyores resultaos eleutorales, con 57 escaños y representación en toles comunidaes autónomes menos n’Euskadi. La so estratexa con respeuto a Pedro Sánchez y la investidura, y el so averamientu a VOX nes instituciones pesó ente’l so eleutoráu, algamando diputaos sólo en Catalunya, la Comunidad de Madrid, Andalucía y la Comunitat Valenciana.

N’Asturies tamién perdió’l so representante, Prendes, que pasó de recibir un 16,71 por cientu de los votos a un 6,66 por cientu, de lo que se benefició Foro pol aumentu de cinco puntos del porcentaxe de votos de la so coalición col PP.

Na semeya, Rivera recibe l'apoyu de diputaos y compañeros de Ciudadanos tres la so anuncia d'esta mañana.