'Muyeres inesperaes' abre'l III Premiu y Festival Nel Amaro

L'uvieín Teatru Filarmónia acueye tolos vienres de payares les representaciones de les obres finalistes. Son d'accesu llibre.

Ververemos va ser la primera en poner n'escena la so creación nel III Premiu y Festival Nel Amaro de Teatru Profesional en Llingua Asturiana o Gallego-asturiano. Trátase de 'Muyeres inesperaes', historia de la qu'hai preparada una adaptación pa serie de ficción, con programa pilotu grabáu baxo la direición d'Adolfo Camilo Díaz hai poco más d'un añu, pendiente d'algamar un alcuerdu cola RTPA pal so desendolcu completu.

La obra pon n'escena a seis personaxes que viven cuatro situaciones diferentes, entellazaes ente sí. Una historia de marcáu calter femenín y feminista con situaciones de comedia con ciertu toque dramáticu.

La representación va comenzar a les 20 hores, con entrada llibre hasta completar aforu. El vienres que vien el turnu va ser pa El Callejón del Gato, qu'algama la final con ‘Crecer’, mentes que’l 22 toca-y a Higiénico Papel Teatro, con ‘Una casa’, y el 29 a Factoría Norte, con ‘Les rellaciones peligroses’.