Xuntanza Vegana afonda nel veganismu y l'antiespecismu con una perspeutiva feminista

Va celebrase en Xixón con conferencies, talleres, cuentacuentos, una actuación musical, una amuesa y una preba, actividaes protagonizaes toes elles por muyeres.

El Centru de Cultura Antiguu Institutu va acoyer esti sábadu tola programación de la Xuntanza Vegana, "primer eventu multidisciplinar n'Asturies al rodiu'l veganismu ya antiespecismu". Esta iniciativa, n'asturianu dafechu, naz col envís d'averar "d'una forma respetuosa y divulgativa, información sobre'l conceptu veganismu y tolo que lo arrodia, cómo nos afecta a les humanes y a les non-humanes", y ta abiertu a cualesquier persona "que quiera descubrir o saber más sobre veganismu".

A les 11.30 hores va comenzar l'actividá cola primer conferencia, 'Claves pa una dieta vegana (100% vexetal) saludable', a cargu de la nutricionista Shafika Perea. Darréu, a les 12.30 hores, va ser el turnu de la psicóloga Marta I. González, sobre ética y deporte, con una charra de 'Xuegu llimpiu: deporte y los otros animales'.

Yá de tarde, les temátiques a tratar van ser arte y activismu, ética animal y santuarios. Asina, a les 16.30 hores, Irene Ziel, fundadora del proyeutu fotoperiodísticu All Beings, va falar de 'Derechos Animales', pa siguir una hora depués Olaia Freiría, coordinadora internacional pal mundu de fala hispana de la Fundación Ética Animal, con 'L'antiespecismu y la defensa de los animales nel mundu xabaz', pa zarrar con 'Una segunda oportunidá pa vivir llibre y feliz', con representantes del Frente L.A. Santuario Animal.

La Xuntanza Vegana va contar amás a lo llargo del día con una amuesa de semeyes por parte de Ziel sobre granxes y la realidá d'estos espacios d'esplotación animal, y l'actuación de Sara Rivera col so proyeutu Angry Youth, que va poner el ramu al actu a les 20 hores nel patiu central, onde enantes va haber talleres infantiles y cuentacuentos. Tamién va entamase una preba de platos 100 por cien vexetales dirixida pola youtuber Raquel Suárez, responsable de la canal 'Veganamente'.