L’esbardu Saba, recoyíu en mayu en Proaza, va tornar a la llibertá en Picos

L’operativu pa devolver a la llibertá a Saba, l’esbardu recoyíu nel mes de mayu en Proaza, cola inteción de que s’avece al so entornu nuevu enantes de comenzar cola hibernación yá ta en marcha. El so llar nuevu va ser el Parque Nacional de los Picos de Europa.

Los equipos téunicos de los gobiernos d’Asturies, Cantabria y Castilla y Lleón, col sofitu del Ministeriu pa la Transición Ecolóxica, tán trabayando de manera conxunta, al traviés de protocolos comunes, y ultimen los detalles de la suelta del animal. La lliberación va facese en condiciones de precaución estrema y ensin contautu con humanos p’aumentar les posibilidaes d’ésitu de la reintroducción nel medio natural.

La zona de la suelta escoyóse tres analizar variables múltiples, ente les que destaquen la disponibilidá d’alimentu y la presencia baxa de persones. Otra manera, el treslláu al nucleu oriental del cordal podría contribuyir a coneutar la población osera presente nesta área, non mui numberosa, cola del occidente, muncho más estabilizada.

L’esbardu, una fema, pasó’l mes y mediu últimu nun recintu en semillibertá nel monte de Valsemana, en Lleón. Mientres esti tiempu siguió recuperando peso –espérase que supere los 35-40 quilogramos– y amuesa un comportamientu d’alerta y busca activa d’alimentu, polo que presenta condiciones óptimes pa proceder a la fase final de tresporte y lliberación nel mediu natural.

De Proaza a Cantabria

La Guardería de Mediu Natural, en collaboración con téunicos especializaos, recoyó a la cría d’osu cantábricu na redolada de la corralada osera de Proaza. Paecía desnutrición, deshidratación y alteraciones neurolóxiques, polo que la unviaron a un centru veterinariu pa estabilizala. Tres esperimentar una ameyoría leve, alcordóse’l so treslláu al Centro de Recuperación de la Fauna Silvestre, en Cantabria, unes instalaciones específiques pal tratamientu d’estos animales.

Mientres los trés meses que permaneció ellí, Saba tuvo baxo control permanente y especializáu, anque ensin contautu visual colos sos cuidadores, y algamó un desarrollu óptimu, hasta llegar a los 23 quilogramos de pesu. Nesi momentu, el setiembre pasáu, traslladáronla al recintu de Valsemana como pasu previu a la so reintroducción nel mediu natural.

Na semeya, Saba nel mes de setiembre a la so llegada a Valsemana.