La reforma del reglamentu pa permitir l’usu del asturianu na Xunta va siguir un trámite d’urxencia

La Mesa de la Xunta Xeneral aprobó esti llunes, col apoyu de la FSA y Asturies pela Izquierda, la tramitación d’urxencia pa la reforma del reglamentu de la Xunta Xeneral pa permitir l’usu del asturianu na Cámara. El miércoles el Plenu dio’l preste a la toma en consideración de la propuesta presentada pola coalición.

El diputáu Ovidio Zapico destacó la importancia d’esti pasu al entender que ye "imprescindible pa normalizar l’usu del asturianu siempre que cualquier persona na Xunta, sía diputáu o non, quiera emplegalu". Asina, preténdese que nun se repitan más situaciones como la que vivió la conseyera Berta Piñán, que nun pudo presentar n’asturianu les sos propuestes pa la llexislatura na Comisión de Cultura, Política Llingüística y Turismu pola negativa de PP y VOX, a la que se sumó depués Ciudadanos, basándose nuna intepretación del reglamentu de la Cámara.

Asturies pela Izquierda presentó al día siguiente una propuesta pa la modificación del mesmu que se tomó en consideración el miércoles tres llevalu a Plenu gracies a los votos de la coalición, de la FSA y de Podemos. La Xunta de Voceros refugara enantes la llectura única pela vía d’urxencia, como pretendía la coalición p’axilizar la so tramitación.

Na semeya, Ángela Vallina defiende nel Plenu la propuesta del so grupu parllamentariu, con Zapico detrás.