Avilés celebra la seronda con música, baille, gastronomía y teatru

La plaza Les Aceñes acueye esti vienres y sábadu la XVII Seronda n'Avilés, centrada nes tradiciones populares d'esta época del añu.

La última fin de selmana d'ochobre yá ta marcada en coloráu por toles avilesines y avilesinos. Dende l'añu 2003 estos díes tán dedicaos na villa a celebrar la seronda y disfrutar de la cultura asturiana.

La música y el baille del país, la gastronomía y el teatru costumista nun falten nesta cita qu'entama la Fundación Municipal de Cultura y la Estaya de la Llingua en collaboración con Xuntanza Avilés, Mercáu Ecolóxicu y Artesanu, y l'Asociación Cultural Piniella. La inauguración oficial va tener llugar a les 19.30 hores cola actuación de la Banda Gaitas El Trasno, anque pela mañana yá hebo actividá na carpa instalada en Les Aceñes con xuegos populares pa la reciella y el taller sobre comida saludable '¡Magüestu, esfoyaza y folixa!', amás d'animación musical nel llugar por parte de Los Gascones.

A les 19 hores yá va abrir la carpa, con sidra, castañes y tortos nel chigre, mentes qu'a les 20 hores va haber una amuesa de bailles y sones tradicionales con Xuntaza (Escontra'l Raigañu, Xaréu d'Ochobre y Pleamar). La Nueche en Danza, mentes, va comenzar a les 22.30, y sobre l'escenariu van poner la música 6 Riales y Cantaruxare.

Pote pa xintar

Mañana l'actividá na carpa comienza a les 10.30 hores, con animación y cantares de chigre. A les 14.30 hores va entamase una xinta popular con un menú compuestu por pote de berces y arroz con lleche a un preciu de 5 euros.

La representación, a les 18 hores, de 'El molín encarnáu' por Santa Bárbara Teatro va protagonizar la tarde, que va siguir con música. A les 20.30 hores va actuar Héctor Braga y a les 22.30, La Bonturné, encargándose de pesllar la folixa Los Kikos del Maíz.