#LluchandoPolaSoberanía entama una Selmana Republicana énte la visita de la familia real

Una charra y una mesa redonda protagonicen la respuesta nos díes previos a la entrega de los Premios Princesa nel Campoamor.

Con esta Selmana Republicana #LluchandoPolaSoberanía busca analizar "el réxime monárquicu dende Asturies" y plantegar "alternatives y espacios de discutiniu y llucha". La primer cita va ser mañana, a les 19 hores nel Llar La Llegra, y va consistir na conferencia 'L'Asturorum Regnum: Reflexones alrodiu'l mitu nacional español', a cargu del Rubén Magadán, con un alderique posterior.

Nel mesmu llugar y a la mesma hora, el xueves, Faustino Zapico (IAS), Marina Ardisana (Mocedá Comunista) y Rafa Velasco (Federación Asturiana Memoria y República) van participar na mesa redonda 'Anovando dende Asturies les lluches republicanes ¿Cómo plantegamos un escenariu propiu de reivindicación republicana?'. Mentes, el vienres, baxo la campaña 'Asturies Nun Tien Rei', #LluchandoPolaSoberanía va participar na concentración xunitaria de protesta contra los Premios Princesa convocada a les 17 hores na Escandalera.

A les 21 hores, pa finar la xornada, ta programada una 'Espicha pola República Socialista Asturiana' en La Llegra.