Ástura principia temporada con una conferencia sobre les especies invasores

A cargu de Tomás Emilio Díaz González.

La sétima temporada de les charres de l'Asociación Cultural Ástura sobre cultura asturiana nel Atenéu Obreru de Xixón echa a andar esti martes, el terceru del mes, como ye vezu. Como anunciara'l coleutivu enantes del branu, la primera va tar dedicada a un tema tan interesante y esmolecedor como'l de les especies invasores.

Asina, baxo'l títulu de 'Les invasiones biolóxiques d'Asturies', el caderalgu eméritu honoríficu de Botánica de la Universidá d'Uviéu va falar de la presencia nel país del Plumeru de la Pampa (Cortaderia selloana), la budleya (Buddleja davidii), la yerba del cuchilellu (Carpobrotus edulis y Carpobrotus acinaciformis),  la tritonia (Crocosmia x crocosmiiflora), la margarita africana (Arctotheca calendula), la espartina (Spartina patens) y les acacies y mimoses (Acacia melanoxylon y Acacia dealbata), no que se refier a flora, y l'aviespa asiática (Vespa velutina), el cangrexu americanu (Procambarus clarkii) o'l moxón cebra (Dreissena polymorpha), no que se refier a fauna, ente otros. "Les especies exótiques invasores constitúin una de las principales causes de perda de biodiversidá nel mundu, circunstancia que s'agrava n'hábitats y ecosistemes especialmente febles como son les isles y les agües continentales. La introducción d'estes especies invasores puede ocasionar perxuicios graves a la economía, sobre manera a la producción agrícola, ganadera y forestal, y inclusive a la salú pública", apunten dende Ástura.

La conferencia de Díaz González va tener llugar mañana, a les 19.30 hores, nel llar del Atenéu Obreru de Xixón, asitiáu agora na planta 2 de la Escuela de Comerciu antigua. La entrada ye llibre.

Na semeya, Díaz González nos glaciares islandeses de Vatnajokull.