El Gobiernu esixe que se tenga en cuenta la singularidá asturiana nel plan estatal pa la PAC

Quier que se valores les carauterístiques del territoriu y de les esplotaciones ganaderes.

Alejandro Calvo, conseyeru de Desarrollu Rural, Agroganadería y Pesca, asistió ayeri en Madrid a la xunta de la Conferencia Sectorial d’Agricultura y Desarrollu Rural y al Conseyu Consultivu sobre Política Agrícola p’Asuntos Comunitarios, onde esixó que s’articulen midíes adaptaes al modelu agrariu d'Asturies, sostenible y familiar, y que se refuercen los pagos agroambientales y climáticos. Asina, pidió al Ministeriu d'Agricultura, Pesca y Alimentación que’l plan estratéxicu estatal nuevu pa la Política Agraria Común (PAC) valore la singularidá asturiana.

Destacó que la llendadura tradicional, amás de formar parte de la identidá cultural y económica d’Asturies, ayuda a caltener los hábitats y mengua’l cambéu climáticu. “Por estes razones, les nuestres esplotaciones familiares y la so xestión silvopastoral son grandes sumidorios efeutivos de CO2”, valoró.

Tamién aportunó na necesidá de que la PAC nueva cunte con presupuestu abondu pa sofitar la renta de llabradores y ganaderos, superar desequilibrios históricos ente territorios y empobinar los recursos escontra la xeneración d’emplegu y actividá. Amás, señaló qu’una de les prioridaes tien que ser el relevu xeneracional, pa lo que va ser fundamental la meyora de los incentivos pa la incorporación de mocedá al campu.

Al so xuiciu, tamién va haber que reforciar el papel de les muyeres nel mundu rural y l’establecimientu de mecanismos de discriminación positiva pa zones de monte y esplotaciones pequeñes. Amás, defendió la supresión del cobru actual de derechos históricos y la opción d’afitar un tope máximu de 60.000 euros por esplotación.

Otru de los asuntos que propunxo ye l’impulsu de la coordinación ente’l ministeriu y les comunidaes afectaes pola presencia de l’aviespa asiática, un “asuntu prioritariu” pal Gobiernu d'Adrián Barbón, que va doblar el presupuestu destináu anguaño a desaniciar la vespa velutina hasta algamar los 300.000 euros, en casu de que sía necesario reforciar les actuaciones previstes hasta avientu.

Cuotes pesqueres

Na xunta de la Conferencia Sectorial de Pesca, Calvo esixó un repartu xustu de cuotes que tenga en cuenta la capacidá pesquera del país. El conseyeru señaló que comparte les aspiraciones “llexítimes” del sector d’ameyorar la “distribución tan inxusta de cuota de xarda aprobada nel 2014 en contra de los intereses d’Asturies”.

Sobre esti asuntu, demandó que na negociación viniente de los repartos de cuotes s’introduzan criterios socioeconómicos y de sostenibilidá.

Na semeya, Calvo, nel centru, na xunta de la Conferencia Sectoral de Pesca.