Llega 'Depués d'ochobre', xuegu de rol n'asturianu

Nicolás Bardio y Xon Delacampa son los autores d'esta ucronía na que trunfa la Revolución del 34 n'Asturies y el país pasa a formar de la Xunión Soviética.

"Un xuegu d'espíes, una ucronía de la Guerra Fría: The Americans y James Bond, sidra, vodka, kalashnikov, propaganda y comisarios políticos", asina anuncien 'Depués d'ochobre' na plataforma Verkami, onde mañana, coincidiendo col 85 aniversariu del comienzu de la insurrección revolucionaria asturiana, va ponese en marcha una campaña de cuestación popular na rede pa facer realidá'l primer xuegu de rol físicu n'asturianu. Amás, va presentase públicamente n'Uviéu, nel Manglar, a les 19 hores.

Con una importante promoción en redes sociales, onde ta teniendo una repercusión grande gracies a los munchos materiales asoleyaos, dende un escudu d'Asturies al estilu soviéticu o una versión del himnu de la Xunión de Repúbliques Socialistes Soviétiques al asturianu interpretáu pol Coru Internacional Antifascista Al Altu la Lleva, 'Depués d'ochobre' ta ambientada na década de los 70 y ufre munches posibilidaes a los xugadores. Asina, adáptase a delles situaciones, pudiendo exercer d'espía de la KGB, de la CIA o del CSID.