Política Llingüística va poner un modelu d’oficialidá enriba la mesa nun añu pa empezar l'alderique na Xunta

“Camiento que pa depues del branu, igual un poco primero, podamos ofrecer esi modelu cola nuesa propuesta d’alderique y colos costos que pueda llevar y los sos beneficios”, aseguró Antón García. El direutor xeneral de Política Llingüística participó esti martes na Comisión de Cultura, Política Llingüística y Turismu.

"Como la nuesa propuesta va ser una propuesta modesta y realista, axustada a la realidá sociollingüística d'Asturies, ye posible inclusive que consigamos superávit nesi modelu d’oficialidá que vamos ofrecer", siguió García tres recordar les llinies d’ayudes qu’ufre’l Gobiernu estatal a les llingües oficiales y tamién la Xunión Europea. Asina, nos meses próximos, va reunise “colos grupos políticos representaos na Xunta Xeneral y distintes partes de la sociedá civil, como asociaciones favorables a la normalización del asturianu, empresarios, sindicatos…, pa dir pulsando lo que piensen, dir aprovechando les sos opiniones y dir sumándolu a esi modelu d’oficialidá que queremos aportar al alderique”.

Esta intervención, n’asturianu depués de que la diputada Ángela Vallina, d’Izquierda Xunida (IX) usara l’idioma pa entrugar  a Berta Piñán sobre cuestiones rellacionaes cola llingua asturiana, respondiendo tamién la conseyera n’asturianu ensin la oposición del restu de grupos –VOX yá nun s’alcontraba na sala y el popular José Manuel Felgueres nun intervino, parllamentariu que sí votaría más tarde en contra del usu del asturianu xunto col diputáu de Ciudadanos Luis Armano Fernández Bartolomé–, vieno depués d’una primera de García que se fixo en castellanu pol mandáu de la presidencia de la comisión tres consultar a la lletrada de la Xunta Xeneral presente. Foi a una pregunta de Pedro Leal, diputáu de Foro, sobre’l desarrollu reglamentariu de la Llei d’Usu y Normalización del Bable/Asturianu, momentu qu’aprovechó García pa comunicar “una reflexón que me ruca la cabeza dende equí nesta comparecencia y ye preguntar pol valor que tien les anteriores comparencies que se fixeron n’asturianu nesta Xunta Xeneral. Ye la segunda vez que me veo equí nuna sala; vine convidáu a una comparecencia sobre Cultura onde munchos de los comparecientes espresámonos n’asturianu con toda normalidá. Nun veo qué diferencia hai ente toes eses comparecencies que se fixeron n’asturianu y ésta na que nun se nos permite facela n’asturianu”.

Darréu respondió-y a Leal que la Llei d’Usu “ye’l marcu sobre’l que vamos siguir trabayando hasta que podamos cambiar l’Estatutu d’Autonomía y que pueda recoyer la oficialidá. Realmente yo creo que la Llei del 98 permítenos un ámbitu d’aición mui ampliu; tenemos tovía bastante camín que percorrer dientro d’ella, pero yo creo sinceramente que depués de 20 años ponenos a facer un reglamentu que regule los ámbitos d’actuación nun tien munchu sentíu. Tamos empezando a caleyar per un escenariu un poco distintu que nos debiera permitir superar esa Llei de Bable que, como digo, marca la nuesa fueya de ruta”. “Lo que vamos facer ye un programa estratéxicu d’actuaciones, pero un reglamentu pa una llei que yá lleva 20 años funcionando nun ye l’escenariu que tenemos previstu”, añadió énte la insistencia de Leal.