Félix Fernández: “Tener contactu col asturianu dende les primeres edaes ye fundamental pa la normalización”

Un xuegu de pareyes, dos rompecabeces y un dominó son los materiales asoleyaos por Acuto Xuegos nos sos primeros meses de vida. Félix Fernández Rodríguez (Avilés, 1981) ye responsable d’esta empresa familiar que naz pa cubrir l’ausencia de materiales n’asturianu pa que la reciella pueda divertise al empar que deprender.

¿Facíen falta xuegos n’asturianu pa neñes y neños?

Ye ún de los munchos vacíos que tien l’asturianu na sociedá en xeneral y nel mundu infantil en particular. Que los neños y les neñes tengan medios pa divertise n’asturianu al empar que deprenden ye dalgo fundamental pa la normalización del idioma na so vida.

¿Cómo surde la idea de ponese con ello?

La necesidá de qu’hubiera xuegos n’asturianu yá ye dalgo que vimos fai munchos años atrás. Al tener fíos ves en primera persona y diariamente cuántes coses falten. Seique tuvieron que dase ciertes circunstancies nel planu personal y llaboral que te lleven a intentar y probar coses nueves y col apoyu de la xente de casa, que somos los que tamos tres Acuto, decidimos probar a ver que salía de sacar al mercáu xuegos infantiles n’asturianu.

¿Cuáles fueron los primeros xuegos qu’asoleyaron?

Entamamos editando dos xuegos, que yera’l Xuegu de les Pareyes y un rompecabeces piquiñín sobre les estaciones del añu. Yera un momentu de nun saber nada d’hacia onde diba dir la cosa y quiximos facer la preba con dos productos cenciellinos.

¿Qué recibimientu tuvieron ente’l públicu?

Col recibimientu tamos percontentos, superó con muncho les nuestres espectatives. Yera dalgo qu’echaba en falta muncha xente, agora amás del bon recibimientu ta por ver si tamién hai demanda.

Depués llegó otru rompecabeces y, recién, un material nuevu con animales.

Sí, queremos dir de menos a más. Entamamos con dos productos cenciellos porque nun queríemos saltar ensin comprobar si primero había rede debaxo. Agora queremos dir meyorando diseños y calidaes, y hai que dir poco a poco.

El tercer material qu’asoleyamos foi’l Rompecabeces d’Ayalgues Asturianes, que ye un rompecabeces yá más grande que l’anterior, de 48 pieces, y que recueye a la par que la toponimia de les ciudaes y pueblos más importantes, dibuxos d’ayalgues culturales, naturales o patrimoniales d’Asturies. Dicir sobre esti rompecabeces que, pa bien o mal, quiximos poner en valor ayalgues del nuestru patrimoniu que seique tean dexaes más de llau, por espaciu nun recoyimos otres qu’agora la xente echa en falta. Por exemplu prefirimos reivindicar l’horru beyuscu, que pensamos que lo necesita más qu’usar la imaxe de la Santina. Pero bono, tamos nun continuu aprendizaxe.

Y l’últimu material que ta recién asoleyáu ye’l Dominó d’Animales d’Asturies col que queremos dar un pasu más en calidá de diseñu, material y sobre too utilidá llingüística. Nunes poques partíes un neñu o neña va conocer el nome de tolos animales que recoyimos. Ye un xuegu de 32 cartes, d’elles 30 son d’animales, una cola traducción de los nomes de los animales y vocabulariu pa facilitar el xuegu a les families que nun los conozan y otra coles instrucciones. Nesti xuegu tamién quisimos recoyer carauterístiques de cada animal, tipo’l nome n’asturianu del soníu que fai o dalguna otra carauterística, dalgo que nos pareció perinteresante y pa los que nos ayudó muncho la xente de Sabencia y otros collacios.

¿Cómo ye’l procesu d’ellaboración de los xuegos?

Les idegues vienen daes casi siempre polo que se ve en casa coles neñes: cómo son los sos xuegos y cuáles pueden ser los más útiles llingüísticamente falando, al empar que divertíos.

¿Por qué ye importante’l contautu cola llingua materna nestes primeres etapes de la vida?

Tener contactu col asturianu dende les primeres edaes ye fundamental pa la normalización social del idioma. Oxalá tuviéremos nuna situación na qu’una neña que naza güei creciera estudiando asturianu dignamente na escuela, teniendo l’asturianu en dibuxos animaos, con una ufierta cultural pa ella tamién n’asturianu y, no que nos toca, con xuegos y xuguetes na nuestra llingua.

Dende un primer momentu comunicaron que’l primer añu plantegábenlo a mou de prueba pa ver la viabilidá de la empresa. ¿Superóse la prueba?

Tamos tovía nello. Asturies pa dalgunes coses ye mui pequeña y a ello tenemos que sumar que’l mercáu n’asturianu yelo tovía muncho más. Penalízanos muncho’l fechu de tener que facer tiraes pequeñes porque failo too más caru y penalízanos tamién l’entornu nel que nos movemos; quiero dicir, cuando toos tamos avezaos al ‘Made In China’ desiximos en prácticamente tolos llaos una rellación de calidá/cantidá/preciu semeyante, y eso ye imposible. De China y en castellanu vienen millones d’exemplares d’un mesmo productu a precios mui baxos y esa ye la referencia que se tien del valor de les coses y esto va totalmente a la contra de proyectos pequeños destinaos pa comunidaes llingüístiques pequeñes.

Como reflexón prestaríame dicir que nel asturianismu, cada cual na so vida diaria, deberíamos dirixinos a un mayor apoyu y consumu de productos n'asturianu. El consumu ye activismu, una ferramienta de tresformación y hai que facer pedagoxía con ello, y nosotros, que nos xuegos somos productores pero en tolo demás consumidores, tamién nos incluyimos nesa necesidá que tenemos de facer dalgo más por apoyar al restu de productores n'asturianu.

¿Pretenden entamar proyeutos más ambiciosos, como xuegos de mesa, pa un públicu adolescente o adultu?

Tenemos delles idegues y delles maneres d’enfocales. Agora col dominó, cuando veamos que resultaos tien too, ya zarramos esta primera fase d’Acuto y cuando podamos ver los resultaos valoraremos qué coses facer. Pero si, idegues de xuegos de mesa y pa edaes adultes tenemos en mente. Prestaríanos tamién intentar facer dalgo n'eonaviego. Y como apuesta de negociu tampoco nos zarramos a facer ediciones de los orixinales n'asturianu n'otros idiomes .De fechu agora mesmo tamos faciendo una campaña de crowdfunding p'asoleyar una versión en gallegu del Xuegu de les Pareyes.

¿Ónde se pueden atopar los vuesos productos?

Vendemos directamente on line y tamién tenemos un puestín de venta que ponemos delles veces en dellos mercaos o fiestes. Tamién tenemos dellos puntos de venta per Asturies que se pueden consultar nel nuestru blogue.

Na semeya, Félix Fernández xunto coles sos fíes Deva y Llara.