El Día’l Traxe’l País prepárase p’acoyer el concursu ‘Indumentaria’ de mayor participación

Añu tres añu, el Día’l Traxe’l País nun apara de medrar. Esta xornada en Grau al rodiu la vistimienta tradicional asturiana de la segunda metá del sieglu XIX, qu’axunta a trés centenares de persones preparaes pa la ocasión, va vivir esti domingu el ‘Indumentaria’ más participativu, con 50 inscritos, y una gran tarde de baille.

Muyeres y homes llegaos de Tapia, Candás, Llanes, Piloña, Mieres, Llangréu, Xixón, Uviéu y Madrid van xunise a una bona representación de moscones pa desfilar, a partir de les 13 horas frente a la capiella de Los Dolores, “na única y más hermosa pasarela de moda del sieglu XIX” col acompañamientu musical d’Octavio Trapiella y Dolfu Fernandez. “50 propuestes diferentes y personales, qu’enseñarán la manera de vistir de los nuesos antepasaos destacando les carauterístiques propies de los diferentes llugares, situaciones vitales y posiciones sociales. Pañu finu y basta estameña, muncho prieto y pardo resaltao con collores vivos o apagaos, seda y terciopelu, ricos y probes…, too veráse y vistiráse en Grau na mañana del domingu”, espliquen dende B. Alto, empresa organizadora y creadora del Día’l Traxe’l País y ‘Indumentaria’, qu'encara la so cuarta edición.

En ‘La flor de los traxes’, como s’empieza a conocer en Grau esta fiesta, también van pode vese dalgunas de les pieces escases d’indumentaria antigua –o ‘pieces testigu’– que se conserven n’Asturies y que, gracies al concursu, salen del escaezu. Mantos, mantes, manteos, pañuelos, perendengues, capes, polaines, etc. van llucise en ‘Indumentaria’, concursu que tien en cuenta la confección de los traxes, la combinación, los complementos y el xeitu en vistir. Ente estes piece antigües, “fundamentales pal conocimientu y estudiu de la nuesa historia”, destaquen les que se verán nel apartáu ‘Muestra’ –fuera de concursu–, que componen una pequeña pero valiosísima coleición de prendes de muyer procedentes del conceyu de Cangas del Narcea pertenecientes a la coleición particular de Xosé Antón Fernández ‘Ambás’ y Ramsés Ilesies, que ven la lluz gracies a la so collaboración desinteresada cola organización y el Conceyu de Grau.

Los que participen en concursu aspiren a llevar un primer premiu valoráu en 200 euros, tanto na categoría d’home como na de muyer. Los segundos y los terceros van recibir 150 y 100 euros, de manera respeutiva, toos ellos patrocionaos por Caja Rural de Asturias.

El xuráu d’esta iniciativa nacida “pa poner en valor, enseñar y reivindicar la escelencia nel vistir a la hora de llucir los traxes tradicionales asturianos” va tar formáu por Consuelo Riu, Ana Villanueva, Amadéu Benavente y Constantino Menéndez.

Un gran baille pela tarde

El Día’l Traxe’l País sigue pela tarde, cuando va entamase un gran baille “a lo suelto y a lo agarrao”. “Esta fiesta de la indumentaria recupera la forma antigua de baillar de los asturianos. Too asocede de manera espontánea, al son de la pandereta, la gaita y el tambor; de manera natural van formándose y asitándose les pareyes na filera o’l corru, entrando y saliendo bailladores hasta’l final de la pieza”, apunten dende la organización.

L’escenariu va instalase na Plaza’l Mercáu, siendo la primera en xubir a tocar, a les 17 hores, Leticia Baselgas, pa siguir colos toques y voces de dos vaqueires de raza, Rogelia y Clarita, que traen el folclor de les brañes de Valdés. La gaita y el tambor enllenarán depués la plaza colos sones del centru d’Asturies de la mano d’Iván y Fonsu Les Regueres, interpretando xotes, muñeires y saltones.

Darréu será’l turnu d’otra pareya de pandereteres, Laura y Guadalupe de Fitoria, a les que darán el relevu los sones del oriente de la mano del tambor de Manolín el de Parres y la gaita de Santi Galguera. Los cantares y sones a las panderetes interpretaos pol tríu Cantaruxare, compuestu por Ambás, Ramsés y Paulino, pondrán el ramu “a un día únicu enllenu de color, identidá y allegría asturiana”.

Otra manera, la reciella tamién va tener un especiu pa la so diversión. De 11 a 12.30 hores, frente a la Casa Conceyu, van entamase xuegos y un taller de baille tradicional a cargu de Prau Llerón.

Semeya obra d'Ojos de Hojalata Fotógrafo.