Un dominó con animales asturianos, xuegu nuevu pa la reciella

Acuto Xuegos ta acabante de presentar la so novedá última. Trátase d’un dominó con animales d’Asturies, que se suma a los dos rompecabeces y el xuegu de les pareyes asoleyaos por esta empresa que crea materiales en llingua asturiana pa la reciella.

El coríu, la palomba, l’esguil, el cascoxu o la caparina son dalgunes de les nueses especies que protagonicen el ‘Dominó d’Animales d’Asturies’. Trátase de 30 cartes con otros tantos animales –y dalgunes de les sos carauterístiques– nos qu'hai qu'axuntar el nome cola so imaxe, que ta n’otra, y 2 más con vocabulariu y les instrucciones.

Tolos xugadores reciben cinco cartes caún y tien el funcionamientu del dominó tradicional, cola diferencia de que cada carta tien una imaxe y un nome. La diferencia col xuegu clásicu ye que si nun pue casala, garra otra del tacu que podría poner nel casu de que sía válida, ganando’l primeru que quede ensin cartes.

Ideal pa cualquier edá, con esti material les neñes y neños asturianos van poder divertise al empar que deprenden los nomes de los animales n’asturianu. El xuegu ta a la venta na rede y tamién se va poder atopar nos acontecimientos nos qu’Acuto Xuegos ponga puestín.