El XVI Asturies Nun Escaez y el DMR conmemoren el 5 d'ochobre'l 85 aniversariu de la Revolución del 34

La madrugada del 5 d’ochobre del 1934 dio aniciu la fuelga xeneral que n’Asturies derivaría nuna insurreición revolucionaria, proclamándose la República Socialista d’Asturies. 85 años depués, Uvieú va acoyer los actos del DMR y el conciertu Asturies Nun Escaez que conmemoren la Revolución d’Ochobre.

Darréu encárgase un añu más de la organización d’esta iniciativa n’alcordanza del 34 que tien presente tamién reivindicaciones d’anguaño, como la llucha estudiantil, la feminista, la respuesta a la contaminación o a la problemática de les apuestes deportives. Anque les actividaes del Día de la Mocedá Revolucionario (DMR) van tar concentraes el mesmu sábadu, día 5, la xornada previa va entamase una charra a cargu de muyeres d’IKE y Obrerol, y d’Euskalduna, de títulu ‘La llucha de les muyeres d’ayeri, exemplu pa la mocedá’, a les 19 hores nel Llar La Llegra.

La Plaza del Paragües va concentrar les actividaes matutines del sábadu, con un actu internacionalista al meudía, una sesión vermú coles pandereteres Nun Tamos Toes (13.30 hores) y una xinta popular (14.30 hores), con costu de 5 euros y opción vegana, pa lo que ye necesariu acutar plaza na direición darreu.moceda@gmail.com. De tarde, a les 17 hores, va celebrase una mesa redonda cola participación de la Xunta Estudiantil Asturiana, La Rede Xixón Oeste y Ludópatas Asociados en Rehabilitación del Principado de Asturias (LARPA).

Va zarrar el DMR la decimosesta edición del conciertu Asturies Nun Escaez, nacíu nel añu 2000 de la mano d’Andecha Mocedá pa tomar el relevu Darréu cuatro años depués pa entamar la so tercer edición en conmemoración naquel añu del 70 aniversariu de la Revolución d’Ochobre. Nesta ocasión los grupos que van participar son Sartenazo Cerebral, Skama la Rede y los vascos Radiocrimen.

L’apertura de puertes na sala Sir Lauren’s ta prevista pa les 19.30 hores, mentes que les actuaciones van principiar a les 20. El preciu de la entrada ye de 8 euros anticipada y de 10, na puera, cola posibilidá de mercar un bonu sofitu na rede por 5 euros.

Los tickets yá tan a la venta en La Luna y L’Esperteyu, n’Uviéu; en La Prestosa, en La Pola Siero; nel CSA La Semiente, en L’Entregu; na sidrería Canteli, en Xixón; en La Traviesa, en L’Infiestu: y en Matteria Creativa, en La Felguera.