El Gobiernu y el Ministeriu de Xusticia roblen un conveniu de tresferencia teunolóxica

Los órganos xudiciales y fiscales van utilizar les aplicaciones y sistemes teunolóxicos del Ministeriu de Xusticia pal desarrollu de la so actividá tres la robla d’un conveniu con Madrid. La ciudadanía va beneficiase d'un serviciu más áxil, eficiente y tresparente.

El presidente Adrián Barbón acudió ayeri a la firma xunto col vicepresidente Juan Cofiño y la conseyera de Presidencia, Rita Camblor, tando representáu l’Executivu estatal pola ministra Dolores Delgado y la direutora xeneral de Modernización de la Xusticia, Sofía Duarte. Dambes instituciones comprométense a implantar la xusticia ensin papeles n’Asturies y a desenvolver l'espediente electrónicu, que va entrar a valir anguaño, cuando remate'l periodu de formación de los profesionales.

Entre otros aplicativos, Xusticia va poner a disposición del país el sistema de Xusticia Dixital que posibilita la tramitación electrónica de los procedimientos xudiciales y que ta integráu pola plataforma de comunicaciones electróniques LexNET, el portafirmes electrónicu, el visor Horus d’espedientes dixitales, el sistema de xestión procesal Minerva y el portal de servicios Wasmin. El conveniu tien una validez de cuatro años y sustitúi al anterior alcuerdu de collaboración teunolóxica, fináu nel 2018.

“Vamos aforrar recursos, vamos simplificar la xestión documental y vamos ganar axilidá na adopción de resoluciones”, destacó Camblor tres la firma.

Na semeya, Barbón y Delgado.