Varela pasa a ocupar el cargu de direutora xerente del SEPEPA

Nomamientos nuevos na Conseyería d'Industria, Emplegu y Promoción Económica.

El Conseyu de Gobiernu dio lluz verde esta mañana a les dos propuestes presentaes pol departamentu d'Enrique Fernández Rodríguez. Tratábase la de Pilar Varela, ex alcaldesa d'Avilés y conseyera de Servicios y Derechos Sociales na llexislatura anterior, como direutora xerente del Serviciu Públicu d'Emplegu del Principáu d'Asturies (SEPEPA), y el d'Eva Pando como direutora xeneral del Institutu de Desarrollu Económicu del Principáu d'Asturies (IDEPA).

El conseyu rector del SEPEPA, nel que participen el Gobiernu, los sindicatos UXT y CC OO y la Federación Asturiana de Empresarios (FADE), aprobara por unanimidá'l martes el nomamientu de Varela, xustificando la decisión nel so perfil profesional, la so esperiencia y capacidá de xestión, asina como'l conocimientu de la realidá sociollaboral y económica del país, según apunten dende l'Executivu. L'avilesina sustitúi nel cargu a Luisa Pérez.

Nal casu de Pando, trátase d'una ratificación a cargu del conseyu rector del IDEPA, yá que l'ayerana vien ocupándose del organismu dende l'añu 2015.