Al traviés d'un comunicáu, los 65 "militantes d’Andecha Astur que lluchen pola democracia interna nel so partíu", que caltienen un procesu contenciosu-alministrativu contra la direición d'esta formación realizaron güei un llamáu a la mesma pa que retire la so candidatura "fraudulenta" a les elecciones europees, basándose nel autu xudicial que, con fecha 29 de mayu, confirmó un requerimientu anterior nesti sen.

"En nome de los 65 militantes", s'exixe a la formación "que cumpla'l requerimientu xudicial sin tratar de buscar escuses", porque "ye terminante". Recordaron tamién que, nel autu, el xuez dexa claro que "los que presentaron dicha candidatura nun formen parte de la direición del partíu, y poro nun puen participar na so representación nel procesu electoral".

Según afiten "llamentamos tener que dir a los tribunales en defensa de la democracia interna del partíu, pero queremos recordar que fue esta minoría sedicente la qu’entamó les actuaciones xudiciales en febreru de 2007, de magar  la ellaboración d’actes con conteníu falsu, con el fin evidente de quedase coles sigles d’Andecha Astur y apartar a la mayoría de los militantes, a los qu’agora acusa de pasase a otros partíos, nel colmo de la so hipocresía".

SUSPENDIDA D'ACTIVIDAES

Xunto col comunicáu, esti sector críticu fizo públicu güei l'autu xudicial del 29 de mayu que confirma lo dictao n'otru anterior del mesmu xulgáu, con fecha 29 de marzu. Nel mesmu, como nel so día adelantó Europa Press, s'ordenaba la suspensión de toles actividaes y acuerdos de la Xunta Executiva d'Andecha Astur, elixida nun Conceyu Xeneral con fecha 5 d'abril del 2008.

Nel testu se realiza "especial" mención a l'anulación de los acuerdos "referíos a la presentación baxo les sigles Andecha Astur a les elecciones europees a celebrar el 7 de xunu del 2009". Tamién s'ordena'l cese del usu de les sigles Andecha Astur na páxina web andecha.org, asina como de la direición de corréu electrónicu info@andecha.org.

Sicasí, la Xunta Electoral almitió la candidatura rexistrada pa les elecciones europees, motivu pol que los representantes del sector denunciante presentaron, con fecha 15 de mayu, una solicitú pa que'l xulgáu requiriere'l cumplimientu de la midida preventiva dictada. Nel so últimu autu, el tribunal acordó estimar esti requerimientu, y en consencuecia, ordenar la retirada de la candidatura a los demandaos.