La promoción internacional de la llingua y la lliteratura asturiana va ser ún de los oxetivos de Política Llingüística

Esti martes espublizáronse nel BOPA les funciones y la estructura de la Conseyería de Cultura, Política Llingüística y Turismu, de la que va depender l’enseñu del asturianu en tolos niveles y graos. La direición xeneral, que va promocionar internacionalmente la llingua y la lliteratura asturiana, va contar con dos unidaes alministratives.

El departamentu dirixíu por Berta Piñán, como yá s’anunciara, va estructurase con una viceconseyería (Turismu) y trés direiciones xenerales (Cultura y Patrimoniu, Deportes y Política Llingüística). La que s’ocupa de los idiomes del país va tener como funciones “la planificación, desarrollu y siguimientu de la política llingüística del Gobiernu asturianu no referente a la normalización del usu de la llingua asturiana, y del gallego-asturiano nel so casu”, amás de “la defensa, promoción y enseñanza de la llingua asturiana como patrimoniu coleutivu d’Asturies”.

D’igual forma, va depender de la mesma “la planificación, la execución, la coordinación colos demás departamentos de l’alministración asturiana y con otres alministraciones, el control y la evaluación de los programas necesarios pal desarrollu d’una política lingüística que garantice y normalice socialmente l’usu de la llingua asturiana, asina como la so proteición, promoción y difusión, según lo previsto nel Estatutu d’Autonomía y na llei del Principáu d’Asturies 1/1998, de 23 de marzu, d’Usu y Promoción del Bable/Asturianu”. Por último, incorpora “la promoción y potenciación del reconocimientu nacional y internacional de la lliteratura escrita en llingua asturiana, asina como la cultura que s’espresa en dicha llingua, velando pola participación d’artistes en llingües asturianes nos diferentes proyeutos nacionales y internacionales, fomentando l’intercambiu con otres cultures, la traducción a otres llingües y dende otres llingües, los alcuerdos con instituciones y organismos qu’impulsen l’estudiu y l’enseñu de la lliteratura asturiana y la so llingua, y les espublizaciones que dean visibilidá a la ufierta cultural creada n’asturianu”.

Dos servicios

Pal desendolcu d’estes funciones la direición xeneral va apoyase en dos unidaes alministratives en llugar de la esistente hasta la fecha. Asina entámase un Serviciu de Normalización del Usu de la Llingua Asturiana y Investigación, y otru de Planificación y Conocimientu de la Llingua Asturiana.

El primeru va tener como funciones la planificación de los programes de normalización, la convocatoria de subvenciones, la promoción del idioma en medios de comunicación y la participación en feries y congresos internaciones, ente otros munches. Mentes, va depender del segundu la planificación y execución de programes de difusión y conocimientu de la llingua asturiana; la estensión de la enseñanza del asturianu a tolos niveles y graos, “respetando la voluntariedá del so aprendizaxe, en collaboración con otros servicios y instituciones de les alministraciones públiques”; el fomentu del idioma ente’l funcionariáu; la coordinación de la prueba de certificación de conocimientu adaptada al Marcu Común Européu de Referencia pa les Llingües; les traducciones dientro l’Alministración; y la toponimia, ente otros.

Na semeya, la conseyera Berta Piñán ayeri nel Ecomuséu Mineru Valle Samuñu en compañía de la ministra d'Industria, Comerciu y Turismu en funciones Reyes Maroto.