La Conseyería de Cultura convoca’l primer premiu al meyor cantar en llingua asturiana

"La Música fecho n'asturianu va contar dende esti añu con un nuevu reconocimientu institucional, el Premiu al Meyor Cantar n'Asturianu que se presentó ayeri a los medios de comunicación nuna xinta informal que contó cola presencia del Director Xeneral de Promoción Cultural Carlos Madera y el Xefe de la Oficina de Política Llingüística Ramón d'Andrés. El premiu, que nun va tener recompensa en metálicu, plantease como una plataforma de promoción pal artista ganador, garantizando-y a la so obra una difusión especial nos medios decomunicación y nos eventos promovíos pol Gobiernu.

El premiu, que naz con vocación de ser añal, quier reconocer al meyor tema orixinal con lletra n'asturianu, escluyendo a los cantares tradicionales. Pa esta primer edición del premiu, la Conseyería de Cultura fexo yá una preselección de cantares énte los qu'un xuráu nomáu pola mesma Conseyería va escoyer al ganador. Na escoyeta figuren los temes ""La maleta al agua"", inxertu nel últimu discu del grupu Tejedor y con lletra de Ruma Barbero, el cantar de Carlos Rubiera ""Yá nun van a la Camocha"", ""Exit-encia"" del grupu La Tarrancha, ""Azul y Gris"" del cantautor Toli Morilla con lletra del mesmu Morilla y de la filóloga Marta Mori y 10/8, del grupu Asgaya con lletra de Sergio Álvarez, cinco temes que representen otros tantos estilos estremaos de facer música.

El xuráu del premiu que va escoyer ente estos temes van componelu'l director de la Radio Autonómica (RTPA) Javier Asenjo, l'escritor Adolfo Camilo Díaz, el filólogu Fernando Álvarez Balbuena -autor de lletres pa grupos como Llan de Cubel y Felpeyu-, el productor musical Sergio Rodríguez, titular de los estudios ""Tutu"" de Llanera, y el críticu musical Manuel Abad. El so veredictu va dase a conocer el 21 de febreru, día en que los artistes nominaos van dar una gala especial en Teatru Filarmónica d'Uviéu y na que va facese entrega del galardón, consistente nuna escultura realizada pola artista plástica María Jesús Rodríguez."