La XDLA retruca al PP que la reivindicación de la cultura asturiana nun ye pasiar a una muyer col traxe'l país como si fuera un oxetu

"Si quieren reivindicar la nuestra cultura, que contraten pa San Mateo grupos musicales que canten n'asturianu", declaren dende la XPDLA.

Depués de que la conceyala de Fiestes d'Uviéu, Covadonga Díaz Álvarez, afirmara que recuperar la figura de la Reina y Dames de les fiestes de San Mateo valía pa reivindicar les tradiciones, cultura y folclore asturianu, la Xunta pola Defensa de la Llingua Asturiana (XDLA) refuga que'l PP enmazcarite de reivindicación de la cultura asturiana midíes que cosifiquen la imaxe de la muyer.

Dende la XDLA consideren que coles palabres de la conceyala Covadonga Díaz, 'el PP demuestra qu'entiende'l patrimoniu cultural asturianu dende unos parámetros decimonónicos y patriarcales, más propios de los Coros y Dances de la Sección Femenina que del procesu de recuperación qu'entamó n'Asturies nos años setenta del sieglu pasáu y que permitió que les nuestres tradiciones se recuperaren y llegaren hasta güei'.

L'apoyu a la cultura asturiana supón midíes como que'l Conceyu d'Uviéu dexe d'imcumplir la Llei d'Usu y empiece a usar la toponimia oficial, reclamen dende la XDLA. 'Ye chocante que los que falen agora d'apoyu a les nuestres tradiciones son los mesmos que refuguen l'usu del asturianu y que tienen como única política llingüística'l monollingüismu en castellanu', denuncien nel so comunicáu.

Pa finar, aconseyen al PP que 'si quier usar San Mateo pa reivindicar la nuestra cultura, lo primero qu'habría que facer ye contratar a grupos musicales que canten n'asturianu p'actuar nes fiestes, da-y un sitiu dignu al nuestru folclor y alloñase d'un pasáu anacrónicu y tresnocháu impropiu d'unos tiempos onde la llucha pola igualdá ye protagonista. Pasiar a una muyer col traxe'l pais como si fuera un oxetu nun ye cultura asturiana; eso tien otru nome. Que nun usen el nome de la cultura asturiana pa eso'.