Educación va rectificar el proyectu de curriculum de primaria que fai competir l’asturianu con otres asignatures

"Dempués de la rabasera de crítiques que xeneró nel ámbitu sindical la presentación del documentu- borrador de curriculum pa la etapa d'enseñanza primaria, que pon a competir la enseñanza d'asturianu con otres materies curriculares, el Conseyeru d'Educación José Luis Iglesias Riopedre esplicó ayeri na presentación del documentu énte los directores de centros educativos que la propuesta ye un borrador espuestu a rectificaciones que van facese pa evitar un tratu negativu pa los alumnos de llingua. Fontes de la Conseyería d'Educación esplicaron qu'hai un compromisu pa dá-y una redacción al primer curriculum qu'espeya la enseñanza d'asturianu nel curriculum acordies cola Llei d'usu del Asturianu y que nun discrimine a los qu'escueyan esta asignatura, como denunciaron masivamente sindicatos d'enseñanza y entidaes como l'Academia de la Llingua o la Xunta Pola Defensa de la Llingua Asturiana, que valoraron mui negativamente la propuesta inicial d'Educación.

El conseyeru d'Educación tresmitió tamién personalmente esta voluntá de modificación del testu a la presidenta de l'Academia de la Llingua, según esplicó a Asturies.com la mesma Ana Cano. La presidenta de l'ALLA esplicó que, de cualquier manera, la institución que dirixe nun podía facer otro que valorar ""mui negativamente"" el documentu presentáu ""por dir a la escontra de la llei d'usu, qu'esplicita que la eleccion d'asturianu ""en nengún casu va poder ser motivu de discriminación de los alumnos"" y que ""pa los que lu escueyan, el so deprendizaxe (del asturianu) nun va poder constituir un obstáculu pa recibir la mesma formación y conocimientos n'igualdá de condiciones que'l restu del alumnáu"". Ana Cano entiende que, en cuenta d'ello, ""el proyectu curricular propuestu propón como alternatives al asturianu en materies que suponen avanzar n'otres árees del currículum y que polo tanto, esfrónase contra la mesma llei"".

En términos asemeyaos s'espresaba sobre l'asuntu la Xunta Pola Defensa de la Llingua, que calificó'l proyectu de ""agresión a la llingua asturiana y a los derechos educativos y llingüísticos"". La organización cívica llamentaba'l fechu de que la llingua pasare a ser, de fechu, una optativa más en competencia con otres na enseñanza, dalgo que ""unío a la precariedá na que s'atopa'l profesoráu d'asturianu dificultaría gravemente la presencia de l'asignatura na mayoría de los centros de primaria d'Asturies como asocede yá na educación secundaria"".

L'Asociación de Trabayadores de la Normalización Llingüística tamién unvió un comunicáu en qu'identificaba'l borrador del Currículum d'Educación Primaria nos términos en que se redactó como un intentu de que la llingua asturiana ""desapaeza de la educación primaria"" al ""equiparala a la situación de discriminación qu'anguaño vive na secundaria y nel bachilleratu"". L'Asociación aprovechó la ocasión pa recordá-y al conseyeru Riopedre'l so compromisu públicu de facer l'asturianu llingua vehicular en dalgún centru pilotu. Los trabayadores de la normalización nos conceyos afirmen que ""la única manera d'acabar cola obligatoriedá, que tanto preocupa a los nuestros políticos, ye facer de los escolinos persones billingües que puedan escoyer el día de mañana qué idioma usar""."