“Llar Solidariu” denuncia pintaes racistes na fachada del so local d’Uviéu

"La federación de colectivos sociales ""Llar Solidariu"" punxo denuncia pola apaición de pintaes racistes y xenófobes na fachada del edificiu onde s'asitien les sos instalaciones, na Cai Gascona d'Uviéu. ""Llar Solidariu"" axunta a los colectivos Xunta pola Defensa de la Llingua Asturiana, Comité de Solidaridá con América Llatina (Cosal), SOS Racismu y Xente Gai Astur (Xega). La federación de colectivos uvieinos ve na apaición d'estes pintaes una ""escalada"" de les actuaciones de grupos d'ideoloxía ultraderechista que fexeron yá delles actuaciones pa provocar un estáu d'ánimu ""contrariu al colectivu d'inmigrantes"" rellacionando les pintaes na so sede coles qu'apaecieron na redolada de les sedes d'otres organizaciones sociales que trabayen con inmigrantes o de pegatines en llugares públicos, supuestamente n'árabe, con falses amenaces a la población local. Amás de la denuncia, dende ""Llar solidariu"" va facese llegar l'esmolecimientu de los sos socios a la Delegación del Gobiernu y a los grupos parlamentarios de la Xunta Xeneral del Principáu d'Asturies."