Remató'l xuiciu pol "casu pipol" con condenes de 10 y 11 años pa Toro y Trashorras

"El xuez Bernardo Donapetry lleó esta mañana nuna vista pública que se celebró en Xixón les sentencies pol ""casu pipol"" nel que se xulgó a los implicaos na trama asturiana de tráficu de los esplosivos que s'emplegaron nos atentaos del 11 de marzu del 2004 que causaron 192 muertes en Madrid. Como resultáu del xuiciu, la Sección Octava de l'Audiencia Provincial d'Asturies condenó a los dos principales implicaos, José Emilio Suárez Trashorras y Antonio Toro, a 10 y 11 años y seis meses de cárcele respectivamente, polos delitos de tráficu de droga y tenencia y tráficu d'esplosivos, declarándose culpables a 16 de los 20 imputaos, con penes que sumen un total de 114 años y 4 meses de presidiu, mientres que s'absolvió a cuatro imputaos por falta de pruebes.

La sentencia, que se da a conocer quince díes enantes de qu'entame'l procesu polos atentaos del 11-M , incluye tamién castigos especialmente fuertes pal ex policía de Samartín de Rei Aurelio Laurencio Castaño García (11 años de cárcele y 11 mas d'inhabilitación profesional), pal traficante de droga gallegu Marcos Barreiro (10 años y mediu de presidiu), pal propietariu del chigre ""El Ancla Angel Manuel Arenal Zapico (9 años) y pa David García Díaz y Francisco Javier Alvarez Sánchez (9 años y 6 meses). Los demás acusaos declaraos culpables recibieron condenes ente los 7 y los 4 años,

El xuiciu pol ""casu pipol"" foi'l más mediáticu que nunca se celebrare n'Asturies. El pasáu 1 d'avientu acabare un procesu de mes y mediu de vista y llectura de conclusiones nel que se xulgó a un total de 20 persones. Les característiques del xuiciu, nel que tomaron parte trés xueces, dos fiscales y catorce abogaos, obligaron a un gran dispositivu de seguridá, entamando la vista con una barrera policial guardando l'edificiu de los xulgaos xixoneses y acreditándose pa siguir el procesu un reducíu garapiellu de periodistes."