La fiscalía caltién los 4 años de cárcele pa Cándido y Morala

"El xuiciu contra los dirixentes de la Corriente Sindical d'Izquierdes (CSI) Cándido González Carnero y Juan Manuel Martínez Morala por daños al mobiliariu urbanu nes movilizaciones llaborales de Naval Xixón quedó ayeri vistu pa sentencia dempués de celebrase la vista oral, na que la fiscalía caltuvo la solicitú de cuatro años de presidiu, multa de 30 meses y indemnización de 5.600 euros pa los dos acusaos pol estrozu d'una caxa de control d'una cámara de vídeu de control del tráficu. Más de mil persones participaron nuna concentración en solidaridá colos acusaos a la puerta del xulgáu.

Los dos sindicalistes declaráronse inocentes y aseguraron nel so turnu d'intervención que yeren ""víctimes d'un montaxe policial y políticu qu'intenta criminalizar les protestes llaborales y favorecer el pieslle del astilleru pa construyir edificios en primera llinia de costa"".

L'acusación apurrió'l testimoniu de trés miembros del Cuerpu Nacional de Policía, qu'aseguraron que la caxa de control de la cámara arreventare cola colocación nella d'esplosivos, una versión opuesta a la de los periodistes y trabayadores del astilleru testigos de la defensa, qu'aseguraron que la caxa de control la rompieren a pataes trés manifestantes cola cara cubierta. L'abogáu defensor dixo que les prebes de la Fiscalía yeren ""inconsistentes"" y que'l testimoniu de los funcionarios de la Policía foi ""contradictoriu"" y ""fechu arremente pa buscar una condena independientemente de la verdá""."