El pabellón d'Asturies na FIDMA reivindica'l protagonismu del país nel aniciu del Camín de Santiago

‘El camín que nació n’Asturies’ ye’l nome de la esposición del pabellón d’Asturies na LXIII Feria Internacional de Muestres d’Asturies (FIDMA). Esta amuesa pretende reivindicar el protagonismu asturianu nel orixe del Camín de Santiago.

Con rigor y vocación divulgativa, percuerre los itinerarios xacobeos na comunidá y destaca’l papel que la conformación de la ruta xacobea desempeñó na historia, la cultura, la relixón y la sociedá europea d’hai 1.200 años. Tamién incide de manera especial nel papel tan relevante que tuvo Asturies na so creación neses primeres décades del sieglu IX baxo'l reináu del monarca asturianu Alfonso II.

El trabayu espositivu ufierta, d'igual forma, testimonios significativos de pelegrinos del pasáu y de les buelgues que dexaron en sitios emblemáticos del Camín. La esposición repártese en cuatro zones que, al traviés d’un trazáu circular, percuerren les trés rutes asturianes del Camín de Santiago (primitivu, costeru y del Salvador) de manera didáutica con una partida d’elementos lúdicos.

Asina, de la planta baxa del espaciu espositivu parte un llaberintu lúdicu onde s’afayen munches curiosidaes como, por exemplu, cuála ye la ruta más popular, quién foi la primer pelegrina o cuándo se celebren los años xacobeos. Nuna de les zones más espectaculares del pabellón, marcada por una gran imaxe d'Alfonso II empezando’l Camín, los visitantes van poder conocer los detalles del orixe de la ruta n’Asturies y les carauterístiques de los trés trazaos, amás de la so historia n’Europa.

L'amuesa tamién fai referencia al Añu Santu que vien, que se va celebrar nel 2021, y esboza los proyeutos nos que trabayen yá delles entidaes y instituciones pa encarar la celebración y promocionar, difundir y crear productos nuevos vinculaos a la ruta, que sigue n’innovación constante. 'El camín que nació n'Asturies' complétase cola esposición fotográfica 'Los valores del Camín', cedida por Correos, y dellos audiovisuales y pantalles interactives.

Amás, el pabellón va tener como soníu ambiente un repertoriu d’efeutos recoyíos pol artista Juanjo Palacios nes reserves de la biosfera d’Asturies, amás d’una escoyeta de cantu gregorianu grabáu poles monxes benedictines del monasteriu uviedín de San Pelayo.

Actividaes programes

Mientres la FIDMA, que va tener abierta les sos puertes hasta'l día 18, el pabellón d'Asturies va acoyer delles actividaes. Asina, esta mañana Coxersa y Ecoembes dieron a conocer 'El Camín del reciclaxe', y el vienres al meudía Correos va facer lo propio cola iniciativa 'El Camino de Santiago con Correos'.

Completa'l programa la charra 'La labor de las asociaciones de amigos del Camino de Santiago y necesidades de mejora desde la actualidad hasta 2021', a cargu de Laureano García, coordinador de les asociaciones asturianes y de les del norte del Estáu, y de María Regla, vocera de les asociaciones costeres na Comisión del Camín de Santiago d'Asturies. Va celebrase'l miércoles viniente a les 12 hores.

Na imaxe, el presidente Adrián Barbón, la ministra Reyes Maroto y la conseyera Berta Piñán, xunto con delles autoridaes, posen ayeri nel espaciu de la esposición del pabellón pa fotografiase con un fondu del Camín de Santiago al so pasu per Caravia. Semeya obra d'Armando Álvarez.